Hatutan.com, (12 Dezembru 2022), Díli—Rezultadu ezame nasionál iha territóriu tomak hatudu katak, iha estudante na’in-21 mak la pasa hosi totál númeru 58.000.

Rezultadu ne’e Ministériu Edukasaun Juventude no Desportu (MEJD) anunsia ofisialmente iha Sesta 09 Dezembru 2022.

Lee Mós:Estudante Na’in-18 “Lakon” iha Ezame Nasionál

Iha esplikasaun hosi Ministru MEJD, Armindo Maia katak, totál estudante ne’ebé tuir ezame nasionál iha tinan ida-ne’e na’in 58.134, maibé na’in 767 mak auzente iha ezame nasionál, tanba ne’e na’in 57.328 mak tuir ezame no húesi númeru ne’ebé parisipa ezame iha na’in-21 mak reprovadu no restu pasa hotu.

“Númeru 57.328 ne’e kompostu hosi Ensinu Báziku, Ensinu Sekundáriu Jerál, Ensinu Sekundáriu Tékniku Vokasionál no Ensinu Rekorrente iha territóriu nasionál,” nia hateten iha MEJD Vila Verde.

Dadus espesifikasaun hosi MEJD, estudante Ensinu Báziku iha territóriu nasionál iha na’in 30.888 mak rejistadu, no na’in 334 auzente no estudante ne’ebé prezente na’in 30.554 ekivalente ho 98,92%. Hosi Ensinu Báziku estudante na’in 30.544 mak aprovadu ekivalente ho 99,97% no reprovadu iha de’it na’in 10 ne’ebé ekivalente ho 0,03%.

Estudante Ensinu Sekundáriu Jerál na’in 22.525, na’in 353 mak auzente ekivalente ho 1,57% no na’in 22.172 prezente ekivalente ho 98,43%. Tanba ne’e, totál estudante iha nível ne’e kuaze na’in 22.162 aprovadu ekivalente ho 99,95% no reprovadu iha na’in-10 ekivalente ho 0,05%.

Iha Ensinu Sekundáriu Tékniku Vokasionál nian, totál estudante 4.339, iha na’in 98 mak auzente ne’ebé ekivalente ho 2,26%. Estudante ne’ebé prezente iha ezame nasionál iha na’in 4.241 ne’ebé ekivalente ho 97,74%. Aprovadu iha na’in 4.240 ne’ebé ekivalente ho 99,98% no reprovadu na’in-ida ne’ebé ekivalente ho 0,02%.

Kona-bá Ensinu Rekorrente, estudante iha na’in 382 no na’in 52 mak auzente ne’ebé ekivalente ho 14%, sira ne’ebe prezente iha na’in 330. Ekivalente 86% hosi totál estudante ne’ebé rejistadu kuaze 100%.

Kona-bá ne’e, Prezidente Komisaun Organizadora, Edia Monteiro esplika, rezultadu ne’ebé ohin anunsia ofisialmente mai hosi ezame nasionál ne’ebé realiza ona durante loron tolu hahú hosi 24 to’o 26 Outubru 2022.

Komisaun Organizadora ba ezame nasionál haree katak, estudante sira ne’ebé la tuir ezame ne’e tanba iha razaun oioin  balun tanba moras, mate no seluk tán.

Mellór Estudante 3.517

Parte MEJD mós halo ona identifikasaun ba estudante sira iha territóriu tomak no hetan estudante 3.517  ne’ebé ho valór di’ak liu ka mellór estudante iha tinan ida-ne’e.

Tuir planu, parte MEJD sei oferese prémiu ba estudante hirak ne’e liu hosi bolsa ida ne’ebé hanaran bolsa méritu.

“Ita sei oferese prémiu ne’e liu hosi bolsa méritu. Agora daudaun ita prepara ona maibé seidauk fó-sai,a maibé ita sei distribui iha Dezembru tinan ne’e no bainhira la konsege sei bele atribui iha Janeiru 2023,” diretór Jerál MEJD, Luis Manuel Ximenes  hateten.

Oras ne’e daudaun MEJD Prevee ona orsamentu millaun $7,2 atu oferese ba estudante ne’ebé tama kategoria mellór klasifikadu.

Tuir planu MEJD nian katak, estudante sira ne’ebé tama iha mellór klasifikasaun ne’e sei foti hosi eskola ida-idak iha territóriu nasionál la inklui eskola internasionál no edukasaun ensinu rekorrente.

Clarícia Piedade Vong Soares. Foto espesial.

Clarícia Primeiru Lugár Nasionál

Iha tinan ne’e mós Estudante feto ida ho naran kompletu Clarícia Piedade Vong Soares hosi Eskola Sagrado Coração de Jesus Becora mak sai hanesan primeiru lugár bá nível nasionál.

Estudante ne’e hosi munisípiu Díli no moris iha loron 06 Dezembru 2004 ho programa estudu Si’ensia Teknolojia.

Valór ne’ebé nia hetan mak hanessan Matemátika 10, Lígua Portugeza 9, Líguan Ingleza 10, Fízika 9, Biolojia 10 no Kímika 9 ho totál: 57.

Jornalista: Rogério Pereira Cárceres