Hatutan.com, (13 Outubru 2021), Dili—Eletrisidade Timor-Leste, Empreza Públika (EDTL,E.P), utiliza Orsamentu Jerál Estadu (OJE) tinan 2021, hamutuk millaun $5 hodi sosa kontadór rihun 120-resin, hosi kompañia Itron hosi Indonézia.

Prezidente EDTL,E.P, Paulo da Silva. Foto/Hatutan.com.

Planu kompras ne’e bazeia ba dadus, katak, daudaun-ne’e kliente hamutuk rihun 197 mak rejista ona iha EDTL, EP, maibé, iha kontadór barak mós aat ona no klienta hamutuk rihun 75 mak halo ligasaun direta no la selu ba Estadu, tanba laiha kontadór.

Notísia iha Relasaun:Eletrisidade Kontinua Mate-Lakan iha Díli

“Tanba ne’e maka agora ita hatama kontadór monofáziku rihun 120-resin, hodi monta iha fatin hotu-hotu. Ne’e sei rezolve ligasaun direta hamutuk rihun 75 ne’e, no mós projetu eletrisidade ne’ebé agora ita implementa, inklui monta kontadór,” Prezidente EDTL,E.P, Paulo da Silva, hateten ba jornalista iha armazén Kaikoli, Kuarta (13/10/21).

Iha Kuarta 13 Outubru, EDTL,E.P simu ona kontadór hamutuk rihun 5 hosi kompañia fornesedór Itron, kompostu hosi tipu kontadór monofáziku rihun haat no trêzfáziku hamutuk rihun ida.

Iha tempu badak, kompañia fornesedór sei importa tán kontadór monofáziku rihun 20 mai Timor-Leste (TL), ne’ebé tuir planu sei fó prioridade ba iha sidade Díli no mós ba munisípiu-sira.

Kontadór ne’ebé oras-ne’e iha ona, parte tékniku sira sei hahú distribui ba munisípiu-sira iha semana oin, atu bele monta iha kliente sira nia uma ne’ebé agora asesu ba eletrisidade no halo ligasaun direta.

“Ohin primeira faze sira hatama, no sei tama tán iha fulan ne’e nia roha, iha Novembru no mós iha Dezembru to’o sira kumpri kontratu,” Paulo da Silva, esplika.

EDTL,E.P mós planeia ona atu instala paralelamente fatin fa’an pulsa ba enerjia elétrika iha kada postu administrativu iha territóriu Timor-Leste tomak, nune’e fasilita konsumidór sira labele la’o dook hodi sosa pulsa.

Iha pakote tetu fiskál 2021 ne’ebé Ministériu Obras Públika simu, hamutuk millaun $178, ho pursentu boot liu ba akizisaun konvustível no manutensaun ba jeradór sira iha sentrál elétrika, inklui manuntensaun liña transmisaun ne’ebé alokadu bai ha kategoria bens no servisu.

La Tolera Ligasaun Ilegál

EDTL,E.P, mós sei halo operasaun ba sidadaun ka konsumedór-sira ne’ebé kontinua no tenta hela atu dada eletrisidade ho ilegál, bainhira deteta parte tékniku sei la tolera.

Antes ne’e ekipa tékniku EDTL, E.P, sempre hala’o operasaun ba komunidade hodi halo identifikasaun ba komunidade ne’ebé deskonfia dada ahi ho illegal, maibé, durante situasaun Covid-19, ekipa labele tún ba terrenu hodi halo inspesaun.

“Obrigatoriamente ita tenke monta kontadór atu ema uza ahi tenke selu,” Paulo da Silva, hateten.

Bainhira tékniku EDTL,E.P tún ba terrenu halo inspesaun mak deteta sidadaun balun dada liña eletrisidade ho ilegál, sei prosesa tuir lei, tanba konsidera krime.

Jornalista: Rogério Cárceres