Hatutan.com, (21 Dezembru 2022), Díli—Reuniaun Konsellu Ministru (KM) aprova projetu Rezolusaun Governu nian rua, ne’ebé aprezenta hosi Ministru Koordenadór Asuntu Ekonómiku (MKAE), Joaquim Amaral.

Ministru Koordenadór Asuntu Ekonómiku, Joaquim Amaral. Foto/Hatutan.com

Aprovasaun Projetu Rezolusaun rua ne’e, ida nomeasaun bá Pedro Godinho dos S. Marçal da Costa bá Kargu nu’udar Prezidente Autoridade Nasionál Dezignada atu Kombate Alterasaun Klimátikas,I.P; no rua maka nomeasaun bá António Lelo-Taci bá kargu nu’udár Prezidente Autoridade Nasionál Lisensiamentu Ambientál,I.P.

Lee Mós: KM Aprova Projetu Dekretu-Lei bá Kriasaun INSP-TL

“Kriasaun autoridade rua ne’e aprova tiha ona iha sorumutu Konsellu Ministrus nian, iha loron 27 fulan-abril tinan 2022,” Hatutan.com sita komunikadu, Kuarta (21/12/2022).

Advertisement

Konsellu Ministru aprova mós projetu Rezolusaun Governu nian ne’ebé aprezenta hosi Gabinete Primeiru Ministru no hosi TIC TIMOR I.P, kona-bá Planu Estratéjiku Nasionál bá Dezenvolvimentu Dijitál no Teknolójia Informasaun no Komunikasaun (Timor Digitál 2032) (2022 to’o 2032).

Planu Estratéjiku “TIMOR DIJITÁL 2032” sei implementa hosi TIC TIMOR I.P., liuhosi koordenasaun hosi Prezidénsia Konsellu Ministrus no hanesan parte integrante hosi Programa Reforma Administrasaun Públika VIII Governu Konstitusionál Timor-Leste nian.

Ida-ne’e nu’udár planu estratéjiku tinan sanulu nian atu dezenvolve teknolójia dijitál sira no TIC, hodi énfaze ba ninia aplikasaun iha área krítika ho impaktu boot iha dezenvolvimentu umanu no ekonómiku, hanesan prestasaun servisu governmanetál sira-governu eletróniku ka dijitál, ekonómia inkluziva, saúde, edukasaun no agrikultura. Hodi mantein aliñadu ho prioridade dezenvolvimentu sira Governu nian, planu estratéjiku ne’e  prepara mós ba adaptabilidade no ba posibilidade atu inklui, neneik-neneik, área adisionál tan.

Jornalista: Rogério Pereira Cárceres

Advertisement