Hatutan.com, (04 Janeiru 2023), Díli– Iha Tersa loro-kraik (03/01/2023), akontese asidente ki’ik  iha tasi laran ne’ebé halo ró Berlin Nakroma kose-kois ró Berlin Ramelau.

Lee Mós : Bankada CNRT Husu Governu Aselera Manutensaun Ró Nakroma

Ró Berlin Nakroma. Foto/Espesiál

Asidente ki’ik ne’e akontese tanba kauza hosi anin no laloran boot. Maske nune’e,  la implika bá ró rua ne’e nia kondisaun. Ho nune’e, Kuarta (04/01/2023),  ró Berlin Nakroma hala’o nia viajen hodi transporta abitante sira hosi Díli bá Rejiaun Administrativu Espesiál Oé-Cuasse Ambeno (RAEOA).

Oráriu viajen ró Berlin Ramelau ho Nakroma maka hanesan;  iha loron Segunda no Kuarta ró Berlin Ramelau  halo viajen bá Oé-Cusse no ró Berlin Nakroma iha Tersa de’it mak bá Oé-Cusse no iha Kinta ho Sabádu bá Ataúro.

“Iha Tersa horiseik (03/01/2023), orariu ró Berlin Nakroma nian, tanba ejizénsia públiku, oinsá atu fasilita transporta pasajeiru sira nia viajen fila hosi feriadu Natal ho tinan foun nian. Ami halo koordenasaun ho autoridade reguladora hanesan Diresaun Nasionál Transporte Marítima no koordena mós ho Diresaun Meterolojia, molok ami faan billete bá pasajeiru 100-resin hodi viajen bá Oé-Cusse. Momentu ró sai ne’e maka laloran boot akompaña ho korente entaun anin dudu ró Belin Nakroma mai kose duni ró Belin Ramelau,”   Diretór Kabutajen Nasionál Autoridade Portuáriu Timor-Leste (APORTIL), Feliciano da Costa Coreia, informa ba jornalista-sira, Kuarta (04/01/2023), iha edefísiu APORTIL, Díli.

Maske akontese asidente ki’ik ne’e, Feliciano da Costa Coreia afirma katak, ró Berlin Ramelau nia kondisaun di’ak hela tanba kona iha tali-fatin no atraka fali iha Portu Díli ho kondisaun di’ak.

Jornalista : Vito Salvadór