Hatutan.com, (04 Janeiru 2023), Díli—Instalasaun liña eletrisidade bá fatin turizmu sira iha Díli la’ós kompeténsia Autoridade Munisípiu Díli, maibé parte Eletrisidade Timor Leste, Empreza Públika (EDTL,E.P).

Prezidente Autoridade Munisipiu Dili, Guilhermina Saldanha.

Prezidente Autoridade Munisípiu Díli, Guilhermina Filomena Saldanha Ribeiro deklara asuntu ne’e relasiona ho kazu iha sítiu turístiku São João Paulo II ne’ebé halo vizitante ida lakon vida kauza hosi instalasaun eletrisidade.

Lee Mós: Komandu PNTL Nomeia Superintendente Xefe Natércia Martins Lidera Munisípiu Díli

Guilhermina Filomena Saldanha Ribeiro  sente triste no lamentável ho kazu ne’e, nune’e autoridade Munisípiu Díli halo ona koordenasaun ho liña ministeriál sira nune’e liu hosi Diresaun Obras Públicas munisípiu Díli nian bele halo kontaktu ho Prezidente EDTL,E.P atu bele rezolve kestaun ne’e.

“Kona-bá instalasaun liña eletrisidade iha jardin no sítiu turístiku sira la’ós autoridade munisípiu Díli nia kompeténsia mesak, maibé ne’e hola parte ba servisu EDTL,E.P nian,” Guilhermina Filomena Saldanha Ribeiro hateten iha edifísiu Komandu PNTL munisípiu Díli, Caicoli, Kuarta (04/01/2023).

Parte Autoridade Munisípiu Díli mós prepara ona karta ofisiál atu haruka ba EDTL,E.P atu tau atensaun ba liña eletrisidade liuliu instalasaun eletrisidade iha fatin turístiku sira la’ós deit iha João Paulo II maibé iha jardin hotu iha munisípiu Díli ne’ebé komunidade sempre ba tuur halimar iha ne’ebá presiza asegura.

Informasaun ne’ebé Hatutan.com rekolla katak, iha loron Kuarta 28 Dezembru 2022, labarik ida ho naran Cataleia de Jesus Borges, idade 9 hakotu-iis tanba hetan xoke hosi eletrisidade iha eskada Santuáriu João Paulo II Tasi-tolu.

“Iha momentu ne’ebá, Cataleia ho nia bin la’o halimar sa’e eskada JP II. Iha eskada sa’e parte kraik, iha bee nalihun oan ida iha kedan besi ring ida iha ne’ebá. Besi ne’e mak tula lampu infeita eskada ba Santuáriu JP II. Tanba bola lampu ne’e nakfera ona, fiu molik hosi lampu ne’e rabat kedan ba besi ring. Cataleia ho nia bin hakat sa’e eskada, nia mós sama ba iha bee nalihun ne’e no hetan kedas xoke hosi eletrisidade no hakotu nia vida,” Hatutan.com sita kronolojia badak ne’ebé haktuir hosi família vítima iha média sosiál.

Paret família mós preokupa ho situasaun ne’e no husu ba parte kompetente ne’ebé responsabiliza Santuáriu João Paulo II atu tau atensaun no haree didi’ak ligasaun ahi sira iha JP II no fatin públiku sira tanba fó risku ba ema nia moris.

Jornalista: Vito Salvadór