Hatutan.com, (12 Janeiru 2023), Díli—Primeiru-Ministru (PM), Taur Matan Ruak hateten, governu esforsu hela atu rezolve situasaun atuál liga ho servisu seguransa, ekonomia no dezastre naturais ne’ebé povu enfrenta.

Primeiru Ministru, Taur Matan Ruak.

Tanba ne’e, husu atu sidadaun hotu-hotu tenke mantein páz no estabilidade atu Governu bele fó solusaun ba povu nia moris.

Lee Mós: Kazu Omisídiu iha Delta-Elemloi, Komisaun B Husu Buka Tuir Lalais Autór

“Ami sei halo esforsu atu buka solusaun ba problema sira hanesan ne’e,” Taur Matan Ruak hateten iha Palásiu Prezidensiál Nicolau Lobato Bairr-Pité, Kinta (12/01/2023) hafoin enkontru semanál ho Prezidente Repúblika, José Ramos-Horta.

Durante enkontru ho Xefe Estadu, Primeiru-Ministru ko’alia oitoan kona-bá seguransa, ema hotu preokupa loos ho akontesimentu sira ikus ne’ebé mosu no garante ba Xefe Estadu katak Governu enjerál liu-liu Ministériu Interiór partikulár PNTL servisu maka’as loos atu buka-tuir kriminozu ka autór sira.

Iha informasaun di’ak ne’ebé iha katak, suspeitu sona joven ida iha Ponte BJ Habibie kaer ona no sei kontinua buka ida ne’ebé sona joven iha Elemloi, hanesan Ministru Interiór garante katak, loron ida ka loron rua tán sei kaer suspeitu. Tanba oras ne’e iha kondisaun buka identifika hodi kaer atu suspeitu sira responsabiliza ba sira nia aktus.

“Ha’u fó garantia ba Prezidente Repúblika katak, ne’e izoladu no polísia sei buka forma hotu-hotu atu mantein kalma, armonia, estabilidade iha ita nia rai laran,” Taur Matan Ruak subliña.

Governu sei halo esforsu atu hadi’a CCTV sira ne’ebé aat, maibé buka mós enkoraza komersiante, negosiante, sidadaun sira atu ida-idak bele monta CCTV iha nia fatin tamba ne’e bele ajuda.

Iha reuniaun ho Xefe Estadu ne’e mós ko’alia oitoan kona-bá dezastre sira ne’ebé afeita populasaun sira, kuaze populasaun familia atus tolu neen nolu (360)-resin iha Timor laran tomak ne’ebé afeita,  balun rai monu hanehan uma, balun seluk ahi han uma, balun seluk anin mak sobu uma, inklui edifísiu públiku hanesan eskola kuaze 110-resin.

Governu servisu maka’as loos atu oinsá tau matan ba sira, kompara ho 2020-2021 ne’e menus loos, maibé ne’e familia sira, inan aman sira mak afetadu, entaun governu buka dalan atu ajuda sira, hamenus todan ne’ebé hetan durante fulan rua liu-liu Dezembru- fulan Janeiru.

Aproveita oportunidade ne’e hodi Informa mós ba Prezidente Repúblika  klaru katak média sira hatene ona Ministériu Finansas fó sai kona-ba kresimentu ekonómia Timor-Leste nian ba tinan 2023  iha pozitivu 3,9 % ne’e di’ak, tanba iha 2017-2020 ne’e ekonómia ba kotuk.

“Iha 2020 kuaze negativu 8% entaun  rekuperasaun ida ne’e di’ak apezar funu iha Ukránia entre Rúsia halo sasán folin sa’e, maibé ita sei bele kontrolla atu labele prejudika liu ita nia nasaun,” nia informa.

Taur Matan Ruak hateten, governu garante ezekusaun Orsamentu Jerál Estadu tinan 2023, la’o ho di’ak maske Timor-Leste sei enfrenta eleisaun parlamentár no eleisaun suku 2023.

Markasaun data eleisaun ne’e Kompeténsia eskluziva Prezidente Repúblika, tanba hanesan eis Prezidente Repúblika hatene ida-ne’e.

“Konaba preparativu ne’e STAE-CNE, naturalmente Xefe Estadu atu marka entaun sei rona partidu sira asentu parlamentár no mós rona preparativu tékniku sira ne’ebé halo hela bainhira ita avansa, ita hatene katak seguru no buat hotu la’o di’ak,” Taur Matan Ruak hateten tán.

Jornalista: Vito Salvadór