Hatutan.com, (17 Fevereiru 2023), Díli—Arguidu JC kumpre prizaun preventiva bazeia bá deklrasaun ho prova sira ne’ebé sufisiente ba kazu abuzu seksuál hasoru minoridade.

Polísia Nasionál Timor Leste (PNTL) akompaña arguido JC (uza faru detidu) partisipa audiénsia primeira interrogatóriu iha TDD, Kinta (16/2/2023). Foto/Elio dos Santos da Costa

JC kumpre prizaun preventiva ne’e hafoin Tribunál Distritál Díli (TDD) deside iha Sesta (17/02/2023) liu hosi Juiz Titulár Ivan Suritai.

Lee Mós: TDD Adia Julgamentu bá Kazu Abuzu Seksuál Hasoru Minóridade

“Aplikasaun medida ne’e tanba iha indísiu forte ba deklarasaun arguidu ho prova ne’ebé iha sufisiente hodi prienxe rekezitu krime abuzu seksuál bá minoridade,” Advogadu Miguel Faria hateten iha TDD, hafoin rona desizaun.

Advogadu ne’e mós reforsa katak, desizaun ne’e foti tanba ho prova ne’ebé iha sufisiente hodi prienxe krime abuzu seksuál menoridade no previstu iha artigu 177, númeru 2 iha kódigu penál Timor-Leste nian.

Advogadu ne’e sei konsulta ho parte família arguido atu hato’o rekursu bá Tribunál liga bá desizaun ne’ebé iha dentru loron 15 nia laran no iha alegasaun ne’e mós defeza rasik husu ona atu Tribunál aplika medida adekuadu ba JC.

Iha Tersa, 14 fulan-Fevereiru 2023, haleu tuku 18:00, lOtl, Polísia Nasionál Timor-Leste (PNTL) ezekuta mandadu kapturasaun hosi Tribunál Distritál Dili (TDD) bá arguidu JC  bá kazu ho númeru úniku kriminál  (NUK) 0016/23, tanba arguidu komete krime abuzu seksuál hasoru minoridade previstu iha artigu 177 lei Kódigu Prosesu Penál.

Jornalista: Rogério Pereira Cárceres