Hatutan.com, (28 Marsu 2023), Díli– Enkarregadu Negósiu Estadu Unidus Amerika (EUA), Tom Daley entrega planu transformasaun portu tuan Díli bá sentru ekonómiku multi funsaun bá Primeiru-Ministru (PM) Taur Matan Ruak. Planu foun Portu Díli nian ne’e sei utiliza kapitál hosi setor privadu atu revitaliza korredór urbanu iha portu antigu ne’e atu bele kria reseita no oportunidade empregu bá Timor-Leste.

Lee Mós : Kondisaun Edifísiu Terminál Portu Díli Grave

Enkarregadu Negósiu Estadu Unidus Amerika (EUA), Tom Daley. Foto/Espesiál

“Hanesan Díli nia koroa ne’ebé furak hodi hateke bá illa Ataúro, Portu Díli aprezenta oportunidade boot hodi kria valór ekonómiku no progresu dezenvolvimentu, no ha’ u orgullu tebes bá apoiu Estadus Unidus nian bá ita-nia serbisu atu revitaliza portu ne’e,” hatete Primeiru-Ministru Taur Matan Ruak liuhosi komunikadu imprensa ne’ebé Hatutan.com asesu.

“Investe iha revitalizasaun Portu Díli nian sei transforma portu ne’e hodi kria oportunidade empregu rihun bá rihun, inklui konstrusaun no dezenvolvimentu urbanu. ”

“Setór privadu nu’udar parseiru importante ida iha dezenvolvimentu Timor-Leste nian, no Estadus Unidus iha kompromisu atu promove setór privadu nia envolvimentu iha planu ida ne’e,” haktuir Enkarregadu Negósiu EUA, Tom Daley.

Dezenvolvimentu Portu Díli, tuir Tom Daley  nu’udar ezemplu di’ak ida kona-bá oinsá setór públiku no privadu sira bele servisu hamutuk hodi revitaliza fatin ida ne’ebé mak seguru liu iha Timor-Leste hodi habelar prosperidade ekonómika ba Timoroan sira hotu.

Liuhosi Projetu Turizmu ba Ema Hotu, Estadus Unidus apoia ona Governu Timor-Leste atu dezenvolve setor turizmu liuhosi promosaun rikusoin kulturál no beleza natural nasaun ne’e nian. Komponente importante ida iha projetu ne’e mak estimula investimentu privadu no hametin sustentabilidade longu prazu ho apoiu ba objetivu sira kreximentu ekonómiku nasionál no diversifikasaun nian.

Iha tinan 2019, USAID asina ona akordu ida ho Autoridade Prontuáriu Timor-Leste nian atu hahú konseitu dezenvolvimentu Portu Díli. Liu husi Projetu Turizmu ba Ema Hotu, USAID hahú estudu preliminár ne’ebé Konsellu Ministrus aprova ona iha Setembru 2022.

USAID finansia estudu viabilidade ida, mapamentu bá aprovizionamentu, no estudu impaktu ambientál/sosiál bá estimasaun dezenvolvimentu ida ho valor millaun $100.

Dezde tinan 2000, USAID fornese ona liu millaun $ 323 atu apoia Timor-Leste hodi harii ekonomia ida ne’ebé inkluzivu no sustentável liuhosi haluan oportunidade ekonómika bá feto no joven sira, apoia setór privadu iha setór xave sira ba kreximentu ekonómiku no hadi’a oportunidade bá kresimentu setór privadu.

Jornalista Estájiaria : Dirce Sandra da Costa Gomes