Hatutan.com, (18 Abríl), Díli—Diretór Jerál Sekretariadu Tékniku Administrasaun Eleitorál (STAE), Acilino Manuel Branco hateten, STAE la halo diskriminasaun ba jornalista sira, maibé desizaun ne’ebé iha bazeia ba Lei no mós regulamentu sira ne’ebé vigora.

STAE hanesan órgaun Estadu, órgaun tékniku ida ne’ebé jere prosesu eleitorál ne’e sempre bazeia ba Lei no mós regulamentu sira. Laiha aktu ida ne’ebé mak STAE hala’o la regula ho Lei, la regula ho Dekretu Governu nian no provas hatudu iha eleisaun sira antes ne’e katak prosesu hotu-hotu la’o tuir Lei no regulamentu.

Lee Mós: Jornalista 251 Simu Kartaun Kredensiál Vota Móvel

Ba eleisaun Parlamentár 2023, aktus eleitorál ne’ebé la’o ne’e sei utiliza nafatin Lei ne’ebé hala’o ona iha tinan 2017 no mós eleisaun antesipada 2018, maski iha proposta alterasaun ba Lei ne’e rasik haruka ona ba Xefe Estadu atu halo promulgasaun, maibé iha nia situasaun ikus hetan veta hosi Xefe Estadu.

“Iha proposta alterasaun ne’ebé iha, kobre mós preokupasaun públiku no mós saida mak jornalista sira nia preokupasaun kona-bá vota livre ne’ebé sai mós preokupasaun Xefe Estadu. Bainhira Lei eleitorál la hetan alterasaun, STAE hanesan órgaun tékniku laiha medida ida atu inventa meius ruma hodi bele akomoda preokupasaun públiku ba prosesu sira eleisaun Parlamentáres nian,” Acilino Manuel Branco hateten iha Palásiu Prezidensiál Nicolau Lobato Bairru-Pité, Tersa (18/04/2023).

Iha Proposta alterasaun Lei ne’ebé haruka ba Prezidente Repúblika iha artigu 36, pontu 6 aumenta tán fraze ida atu fó mós oportunidade ba órgaun komunikasaun sosiál sira tantu privadu no mós públiku atu ezerse de’it direitu votu iha sentru votasaun ne’ebé besik ho knaar fatin bá.

Tanba proposta alterasaun Lei ne’e la hetan aprovasaun, entaun saida mak sai preokupasaun jornalista sira nian, labele akontese.

Liga ho preokupasaun katak media privadu labele vota livre no media estatal de’it  mak vota livre, ne’e tanba ligadu ho Lei ezistente iha artigu 37 hateten katak, sidadaun ida-idak sei ba vota iha fatin ne’ebé nia rejista eletorál ba no agora iha pontu 5 hateten katak, forsa no segura, fiskais sira no ajente administrasaun públiku sira de’it mak bele vota iha fatin ne’ebé sira hala’o knaar ho nota bene katak funsionáriu públiku sira ne’ebé hala’o funsaun iha ámbitu eleisaun la’ós hotu-hotu vota livre.

Jornalista sira ne’ebé servisu iha media estatal, Lei ne’ebé iha ne’e sei prevalese ba sira no sira bele goza sira nia direitu síviku hodi vota iha fatin ne’ebé mak sira hala’o knaar.

“Iha eleisaun Prezidensiál 2022, governu hamutuk ho Parlamentu Nasionál altera tiha hodi fó oportunidade ba média hotu-hotu atu vota de’it iha fatin ne’ebé hala’o knaar bá no governu hanoin katak medida ida ne’e di’ak. Tanba ida-ne’e mak propoin hikas iha proposta alterasaun ne’ebé iha, maibé Prezidente Repúblika la promulga. Signifika kontinua ho Lei anteriór no ita bo’ot sira ida-idak tenke fila fali ba ita bo’ot sira nian fatin hodi ezerse direitu ba vota tuir kartaun eleitorál,” nia haktuir.

STAE la halo diskriminasaun, sa tan halo politizasaun, STAE uza profisionalizmu no ho komitmentu tomak atu hala’o knaar sira ho imparsialidade, neutralidade,  transparente no ho sentidu de Estadu atu garante prosesu hotu la’o ho justu no kredível hodi nafatin hetan konfiansa hosi públiku ba órgaun Estadu ne’ebé iha.

Jornalista: Vito Salvadór