Hatutan.com, (18 Abril 2023), Díli—Prezidente Repúblika (PR), José Ramos-Horta afirma sei sai hanesan observadór neútru, atentu no vizilante durante kampaña to’o eleisaun Parlamentár hodi garante demokrasia loloos iha Timor-Leste (TL).

Prezidente Repúblika hato’o asuntu ne’e liu hosi mensajen bá kampaña no eleisaun Parlamentár 2023 ne’ebé sei hahú iha loron Kuarta (19/04/2023).

Lee Mós: PNTL Tenke Asegura Eleisaun Parlamentár no Intervén Bainhira Iha Violasaun Bá Órden Públika

“Ohin ha’u iha ne’e atu fahe de’it lia-fuan oan ruma kona-bá eventu ne’ebé hahú aban Kuarta (19/04/2023), ita hahú formalmente kampaña eleitorál ba eleisaun Parlamentár 2023. Ha’u sei akompaña permanente iha territóriu nasionál dezenvolvimentu kampaña ida-ne’e, sei fo informasoens ne’ebé permanente no aktualizadu. Ha’u sei sai hanesan observadór neútru, atentu, vizilante,” José Ramos-Horta hateten iha Palásiu Prezidensiál Nicolau Lobato Bairr-Pité, Tersa (18/04/2023).

Xefe Estadu tau fiar primeiru iha líder partidu sira hotu-hotu, líder partidáriu sira-ne’ebé konkorre bá eleisaun, potensialmente, teórikamente bele ukun rai ida-ne’e, sira mak hatene tenki hatudu ba eleitoradu tomak, ba komunidade internasionál, sira-nia preparasaun atu governa rai ne’e. Governa liu hosi Parlamentu Nasionál no potensialmente liu hosi governu.

Xefe Estadu mós tau konfiansa kompletu ba Forsa Armadas, ba Polísia Nasionál Timor-Leste (PNTL), instituisaun rua ne’ebé akompaña malu, tane malu atu garante órden públika.

Tau mós konfiansa ba instituisoens responsável ba eleisoens, STAE no CNE. Ramos-Horta hatene no fi’ar bá  servidór Estadu hotu-hotu iha funsaun ne’ebé sira ka’er sei hatene sira-nia obrigasaun moràl, obrigasaun legál atu respeita votu sagradu kada eleitór.

Tau mós esperansa ba líder partidáriu sira sei fahe ho eleitoradu sira-nia programa ne’ebé sira atu ezekuta bainhira ba iha Parlamentu no ba kaer governu. Saida mak sira atu halo iha tinan lima mai, atu hakle’an dame iha rai ne’e hodi hadi’a povu nia moris.

“Ha’u hein katak, laiha partidu polítiku ida ne’ebé bele halo diskursu ne’ebé ita bolu demagóziku, atake pessoál ké bele enkoraza, insentiva violénsia. Prezidente-da-Repúlika sei rejista diskursu sira-ne’e hotu aktu sira-ne’e hotu no sei kanaliza ba Prokuradoria Jerál da Repúblika,” Ramos-Horta hateten.

Aktu sira-ne’e, sé momentu ruma to’o líder sira-ne’e, partidu sira-ne’e, sei aprezenta aan ba Prezidente-da-Repúblika atu governa rai ida-ne’e, buat hotu-hotu sei tetu sei sukat, tanba buat ne’ebé sira ko’alia determina kompeténsia governante ida nian.

Ne’e duni, iha situasaun ida-ne’e, povu atu ba urnas atu hili Parlamentu foun, liu hosi Parlamentu, governu foun ba tinan lima mai, hotu-hotu sei buka halo buat hotu-hotu ne’ebé hakle’an dame halo buat hotu-hotu sukat, buat ne’ebé ko’alia atu labele hakle’an kanek ruma hodi fasilita ba oin diálogu interpartidáriu, entre polítiku sira, entre líder sira atu bele hetan governu ida forte ne’ebé iha tinan lima nia laran bele halo rai ne’e haksoit ba oin.

“Ha’u-nia liafuan mak ne’e de’it, ha’u-nia respeitu ba partidu hotu-hotu, laiha essesaun ba líder sira hotu-hotu. Boa sorte ba kada partidu, ba líder sira. Agradese ba instituisoens sira-ne’ebé responsável ba ezekusaun téknika ezekusaun administrativa, lojístika buat hotu-hotu ne’ebé presiza halo atu demokrasia la’o ba oin,” Ramos-Horta tenik.

Buat hotu-hotu ne’ebé presiza halo atu demokrasia la’o ba oin hahú ho Comissão Nasionál das Eleisoens (CNE), Sekretáriadu Tékniku Administrasaun Eleitoral (STAE), funsionáriu sira, fiskais sira, observadór, ba forsas de defeza no seguransa.

Jornalista: Vito Salvadór