Hatutan.com, (21 Abríl 2023), Díli—Hafoin kampaña iha kampu futeból Beloi, munisípiu Viqueque, Sesta (21/04/2023) militante Partido Congresso Nacional Reconstrução Timorense (CNRT) hetan tuda hosi ema deskoñesidu iha área Loihunu no Makadiki.

Hafoin kampaña iha kampu futeból Beloi, munisípiu Viqueque, Seste (21/03/2023), militante Partido Congresso Nacional Rekcnstrução Timorense (CNRT) hetan tuda hosi ema deskoñesidu iha área Loihunu no Makadiki. Foto/CNRT.

Militante ne’ebé hetan tuda iha área Loihunu postu administrativu Ossu iha na’in-haat no rezulta vítima sira kanek iha ulun.

Lee Mós: Xanana Promete CNRT Ukun Halo Buat Rua bá Nasaun ho Povu

Iha área Makadiki nian akontese iha Bairru Belula iha militante na’in-tolu mak hetan tuda, na’in-rua hosi Uatolari no na’in-ida seluk hosi Uato Carabau.

Advertisement

Informasaun ne’ebé Hatutan.com asesu hosi militante balun iha parte Ossu hateten, akontesimentu tuda iha área Loihuno-Manuboe iha tuku 18:40 no ema deskoñesidu tuda militante sira ne’ebé ho karreta ikus liu nune’e rezulta militante ida kanek iha parte ulun.

Xefe Suku Afaloicai, postu Administrativu Uatolari, Costantino Guterres hateten, bainhira militante sira fila hosi kampaña ne’ebé hala’o iha munisípiu Viqueque to’o iha área bairru Belula mak mosu insidente balun no akontese tuda-malu iha tuku 19:00.

Hafoin akontesimentu ne’e, jornalista koko halo konfirmasaun ho Komandante PNTL munisípiu Viqueque, Superintendente Xefe Sebastião Alves Quintão, maibé laiha fatin.

Ajente polísia ne’ebé hein iha Eskuadra Viqueque hameno atu bele halo konfirmasaun iha loron tuir mai ho Superintendente Xefe, tanba informasaun kona-bá akontesimentu ne’e parte polísia rasik seidauk simu no atu anunsia bá públiku liu hosi kanál ida de’it mak Komandante rasik.

Koordenadór Partidu CNRT munisípiu Viqueque, Anacleto Freitas hateten informasaun kona-bá militante sira ne’ebé hetan tuda iha parte Loihuno ne’e hosi ema deskoñesidu.

Advertisement

Iha parte Belula, polísia intelijénsia lansa duni tiru sa’e ba leten hodi fó sentidu atu bele hakalma ema labele tuda malu.

Koordenadór ne’e husu atu militante Partidu CNRT mantein hakmatek no kalma no labele provoka malu tanba CNRT hadomi paz no estabilidade.

“Ami la halo keixa tanba ema ne’e halai lakon. Maski ami nia militante ida kanek maibé ba to’o ospitál konsege hetan ona tratamentu hosi médiku sira. Akontesimentu ne’ebé iha, ita sei perdua no husu bá militante sira atu kontinua kria pas,” Anacleto Freitas hateten via telefónika, Sesta (21/04/2023).

Koordenadór ne’e subliña katak, situasaun jerál iha munisípiu Viqueque oras ne’e daudaun hakmatek, no militante sira hosi postu administrativu sira to’o ona fatin ida-idak nian no situasaun kontroladu.

Jornalista: Vito Salvadór

Advertisement