Hatutan.com, (21 Abríl 2023), Díli—Partidu Libertasaun Populár (PLP) ho númeru sorteiu 3  liu hosi ninia kampaña ho tipu diálogu iha suku Laivai, postu administrativu Lautém, munisípiu Lautém, iha Sesta (21/04/2023), Prezidente Taur Matan Ruak deklara ba militante no simpatizante sira katak, iha ninia ukun no bainhira hetan tán fiar hodi ukun sei halo buat ne’ebé povu gosta.

Partidu Libertasaun Populár (PLP) ho númeru sorteiu 3 hala’o kampaña ho tipu diálogu iha suku Laivai, postu administrativu Lautém, munisípiu Lautém, iha Sesta (21/04/2023). Foto/Média PLP.

“Governu ne’ebé ha’u lidera la halo buat ne’ebé ha’u hakarak, la halo buat ne’ebé ha’u gosta, maibé halo buat ne’ebé ita boot sira gosta,” Hatutan.com sita deklarasaun Taur Matan Ruak ne’ebé transmite direta hosi live streaming ofisiál PLP nian.

Lee Mós: PDC Hakarak Halakon Pensaun Vitalísia

Iha programa prioridade PLP nian, Taur Matan Ruak fó-sai katak, bainhira povu fó fiar hodi kaer ukun sei prioridade ida de’it mak ema.

Nune’e, Taur Matan Ruak deskreve katak, prioritizasaun ne’e sei hatuur iha modelu dezenvolvimentu rua. Ida, sei halo uluk estrada, ponte, portu, aeroportu no infraestrutura no kona-bá ema husik ba ikus. Modelu dezenvolvimentu ida seluk maka, dezenvolve uluk mak ema no infraestrutura dezenvolve ikus.

“Ita hili halo buat rua ne’e dala ida de’it tanba bainhira estrada di’ak, portu di’ak, aeroportu di’ak, reseita di’ak, povu sei moris di’ak. Tanba ne’e, saida mak ita boot sira haree durante tinan tolu to’o tinan haat ne’e programa ne’e di’ak ka la’e, ba oin ita halo di’ak liu tán,” Taur Matan Ruak ko’alia perante militante no simpatizante sira iha suku Laivai.

Nia konta tuir katak, uluk hanesan Prezidente Repúblika, nia konsege hala’o vizita bá suku hamutuk 442  iha territóriu tomak inklui suku Laivai.

Durante vizita Estadu iha momentu ne’ebá, Taur Matan Ruak rona preokupasaun barak hosi povu, no Autoridade lokál sira, liuliu kona-bá saláriu Xefe suku sira nian kiik liu, Xefe aldeia sira moris ho saláriu kiik liu, inklui membru Konsellu suku sira.

Rona tiha preokupasaun sira ne’e, ikus-mai iha mandatu oitavu Governu ne’ebé lidera hosi Primeiru Ministru (PM) Taur Matan Ruak konsege responde preokupasaun hirak ne’e.

Prezidente PLP ne’e esplika katak, durante asume pasta hanesan Primeiru Ministru konsege hasa’e saláriu Xefe suku sira nian hosi $140 bá $250. Xefe aldeia sira ho saláriu $100 sa’e bá $ 150 no seluk tán.  

Alende ne’e, iha tinan 2021 Governu ne’ebé Taur Matan Ruak lidera konsege halo konstrusaun foun ba sede suku iha territóriu tomak hamutuk 200.

Iha tinan 2022 konsege konstrui sede suku 200 no tinan ida ne’e iha ona planu atu halo tán sede suku hamutuk 52.

Alende konstrusaun fíziku ba sede suku, konsege hola mós komputadór hamutuk 452 ho impressora 452 ba suku sira iha territóriu tomak hodi fasilita serbisu autoridade lokál sira iha atendimentu iha báze.

Tuir observasaun, kampaña PLP ho tipu diálogu iha suku Laivai ne’e hetan observasaun hosi Comissão Nasionál Eleições (CNE), Provedoria dos Direitos Humanos no Justiça (PDHJ) no hetan mós seguransa hosi Polísia Nasionál Timor Leste (PNTL).

Jornalista: Elio dos Santos da Costa