Hatutan.com, (13 Maiu 2023), Ainaro–Koordenadór Partidu Libertasaun Popular (PLP) Munisípiu Ainaro, Julio da Conceição “Loro Mesak” hateten, Governu da-sia períodu 2023-2028 tenke rezolve lista veteranu sira ne’ebé rejistu iha 2009.

Lee Mós : Governu La Prevee Osan iha OJE 2023 bá Validasaun Dadus Veteranu 2009

Liuhosi diálogu  ho militante no simpatizante PLP iha Aldeia Hutsio, Suku Le-Lima, Postu Administrativu Hatu-Udo, Munisípiu Ainaro, Sábadu (13/5/2023), Julio da Conceição “Loro Mesak”, afirma validasaun dadus veteranu ne’ebé rejistu iha 2009  la depende bá partidu ida, maibé partidu se de’it maka manan hodi nomeia nia ema bá sai Sekretáriu Estadu Asuntu Kombatente no Libertasaun Nasionál ka Ministru Asuntu Kombatente no Libertasaun Nasional nian tenke rezolve validasaun dadus veteranu sira-ne’e.

Koordenadór Partidu Libertasaun Popular (PLP) Munisípiu Ainaro, Julio da Conceição “Loro Mesak” . Foto/Joaquim Coutinho

“Kona-bá asuntu Veteranu ne’ebé rejistu iha  2009 nian,  inan-aman sira hateten bá ita-nia ema sira iha partidu sira seluk dehan lalika fiar sira mai kolia ne’e. Tamba dadus veteranu 2009 la depende bá partidu ida. Buat hotu loos tiha ona hein de’it atu bolu sira bá enkontru hodi deside,”  Loro Mesak hateten.

Nia dehan, maske nia sei la asume kargu Sekretáriu Estadu Asuntu Kombatente Libertasaun Nasionál iha Governu da-sia mai karik, nia mandatu nu’udár Prezidente Konsellu Veteranu Munisípiu Ainaro nian to’o 2024. Tanba ne’e, nia  husu bá Ainaro oan sira atu lalika fiar propaganda sira ne’ebé hateten úniku partidu ida mak iha kapasidade atu halo validasaun bá dadus veteranu ne’ebé rejista ona iha 2009.

Lee Mós : Governu ho CCLN Pendente Validasaun Dadus Veteranu Sira Ne’ebé Rejista iha 2009

Partidu Libertasaun Popular hakarak rezolve problema veteranu no tenke konsidera ema hotu nia luta no dedikasaun hanesan, la haree bá nia idade maibé haree bá nia kontribuisaun bá luta libertasaun nasionál.

“Ha’u hatene problema ne’e barak loos iha Timor-Leste la’ós de’it iha Ainaro. Ema balu uluk baze apoiu iha  hela ai-laran tun tiha mai kontínua buka dalan ligasaun ho FALINTIL sira. Ukun-an tiha mai komu nia família laiha, Partidu la hanesan, osan laiha entaun sai tiha 0,3 sai tiha 4,7. PLP hakarak hadi’a situasaun sira hanesan ne’e,” Loro Mesak tenik.

Atividade diálogu  ne’e hetan seguransa másimu husi PNTL Eskuadra Hatu-Udo  observa husi observadór nasionál no superviziona hosi ekipa CNE Munisípiu Ainaro.

Munisípiu Ainaro kompostu husi Postu Administrativu 4, Suku 21, Aldeia 131. Eleitór sira ne’ebé maka sei partisipa iha Eleisaun Parlamentár, 21 fulan-Maiu ne’e hamutuk 46.908 ho nia sentru votasaun 90 no Estasaun  bá votasaun  hamutuk 115.

Jornalista : Moises Magno