Hatutan.com, (03 Juli 2023), Díli- Timor-Leste  kontínua luta hamutuk ho povu Myanmar hodi kontra injustisa no rejime militár ne’ebé lori sofrimentu no violasaun bá direitu umanus.

Lee Mós : Deklarasaun Konjunta Fó Apoiu ba Enviadu Espesiál Prezidente ASEAN ba Myanmar

Ministra Negósiu Estranjeiru Myanmar, Daw Zin Mar Aung entrega Aung San Suu Kyi nia pintura bá Prezidente Repúblika, José Ramos-Horta. Foto/GPR

Afirmasaun ida ne’e hato’o hosi Prezidente Repúblika bainhira hala’o enkontru ho Ministra Negosiu Estranjeiru Myanmar,  Daw Zin Mar Aung iha Palásiu Prezidensiál Nicolau Lobato, Segunda (03/07/2023).

Ministra Negosiu Estranjeiru Myanmar,  Daw Zin Mar Aung, kontente tebes bele hasoru Prezidente Repúblika Timor-Leste no ida-ne’e mós hanesan vizita dahuluk mai Timor-Leste hodi partisipa iha seremónia tomada de posse bá Governasaun foun.

Nia afirma iha Timor-Leste hasoru malu ho líder bo’ot no revolusionáriu sira, ne’e hanesan esperénsia bo’ot no husi ne’e lori mos há’u ba ba memória iha há’u nia vida polítika ne’ebé uluk hanesan mós dadur ka prizoneiru polítika.

Ho sorumutuk ne’e mós atu fó hanoin katak ohin loron lider polítiku barak mak servisu no luta maka’as ba igualdade jéneru, luta bá demokrasia no liberdade.

“Timor Leste nafatin hamriik no fó solidariedade ba Myanmar nia luta hasoru injustisa, tanba ne’e ami sente orgullu hanesan povu Myanmar hodi hasoru Xefe Estadu Timor-Leste,” Ministra Daw Zin Mar Aung hateten.

Lori povu Myanmar nia naran, Ministra Daw Zin Mar Aung agradese bá solidariedade hosi povu Timor Leste ne’ebé hamriik hamutuk ho povu Myanmar hodi luta bá justisa ne’ebé akontese daudauk iha rai Myanmar.

Ba Timor Leste nia apoiu no povu doben nia ospitalidade hodi fó kontribuisaun no solidariedade ba Myanmar nia luta, Ministra Daw Zin Mar Aung agradese no bá oin kontínua nune’e atu bele iha pás bá ema hotu-hotu iha mundu.

Sita hosi detiknews katak daudaun ne’e ema sivíl liu na’in-10 mate iha militar sira-nia liman.  Mosu akuzasaun oioin hasoru forsa armada Myanmar nian ne’ebé halo violénsia kontra umanidade iha suku sira, inklui halo violasaun seksuál hasoru feto sira, tesi ema-nia ulun no purvolta ema na’in-17 mate.

Ema lubun nu’udár membru rezisténsia kontra Governu, inklui sidadaun baibain ida ne’ebé nia espoza sai vítima haktuir, mate-isin na’in-17 hetan iha suku Nyaung Yin ho Tar Taing, iha área Sagaing, Sentral Myanmar, semana liubá.

Sasin sira haktuir  katak molok ne’e vítima sira  hetan detensaun hosi forsa armada sira, balun hetan torturasaun  to’o hakotu ema nia vida.

Autoridade forsa armada Myanmar nian to’o agora seidauk fó resposta bá akuzasaun kontra direitu umanu sira-ne’e, maibé hateten nanis ona katak povu sivíl sira ne’e barak mate tanba konsekuénsia hosi atake hosi rebelde sira kontra Governu.

Jornalista: Vito Salvadór