Hatutan.com, (24 Jullu 2023), Díli- Timor Resource investe ona millaun $70 bá perfurasaun posu Lafaek, Feto Kmaus no mós atividade survey sira Seismic iha Foho Ailiku, Munisípiu Manufahi.

Lee Mós : Timor Resource Kontinua Hala’o Perfurasaun Bá Mina-Matan Tolu Iha Suai

Atividade balun hosi Timor Resource iha Suai. Foto/dok.Espesiál

Bá investimentu hirak-ne’e, Segunda (24/07/2023), Diretor Timor Resource, Charles Brown hasoru malu ho Prezidente Repúblika, José Ramos-Horta iha Palásiu Prezidensiál hodi informa bá Xefe Estadu kona-bá atividade Timor Resource nian ne’ebé sei halo bá oin.

Iha enkontru ne’e relata informasaun ne’ebé di’ak no hato’o kona-bá perfurasaun mina matan Postu Lafaek iha Suai-Covalima nia rezultadu di’ak, maibé rezultadu hirak ne’e Autoridade Nasionál Petroleum mak sei fó sai.

“Ha’u hakarak hato’o katak to’o agora ami investe ona  millaun $70, hahú husi atividade Seismic too bá iha perfurasaun mina matan sira iha Suai-Covalima no mós foho Ailiku ne’ebé nia atividade Seismic hahú tiha ona,” Diretór Timor Resource, Charles Brown hateten.

Relasiona ho Governu foun harii ona, tanba ne’e Timor Resource  sei mai iha enkontru ho Govenru atu haree oinsá Timor Resource bele hakat bá oin tan ho atividade perfurasaun bá rezultadu ne’ebé iha ne’e.

Kona-bá perfurasaun mina matan iha foho Ailiku ida ne’e hotu hola parte planu, maibé to’o agora sei buka hela prioridade, buka rezolve lai problema tanba to’o agora investimentu husi investidór sira ne’e millaun  $70 bá tiha ona ne’ebé tenke hein rezolve tiha problema agora mak foin haree ida-ne’e.

“Tanba foho Ailiku perfurasaun foun ne’ebé tenke halo maibé to’o agora rezultadu perfurasaun ne’ebé di’ak maibé sei ko’alia uluk ho membru Governu hirak ne’e atu karik iha fatin ruma atu hakat ba oin,” nia tenik.

Kona-bá Teste laboratóriu ba iha rezultadu husi perfurasaun iha posu Lafaek ne’ebé halo iha nasaun Indonézia ne’e rezultadu ne’e ANPM maka fó sai, maibé buat ne’ebé Timor Resource  bele hatete mak tuir sintoma ka tuir buat ne’ebé durante hetan perfurasaun  bele haree katak fó korajen maka’as tebe-tebes signifika iha rezultadu ne’ebé di’ak.

Prezidente Repúblika José Ramos-Horta sei buka haree simu resposta kona-bá informasaun ne’ebé Timor Resource hato’o bá planu ne’ebé  iha no apoiu atividade ne’ebé atu hala’o bá oin.

Jornalista: Vito Salvadór