Hatutan.com, (26 Outubru 2022), Díli- CEO Timor Resource, Sullen Osborne, informa mina matan Feto Kmaus no Li’urai iha prosesu teste hodi haree kapasidade bá produsaun no tuir planu teste ne’e rasik sei halo iha Timor-Leste.

CEO Timor Resource, Sullen Osborne halo sorumutuk ho PR Ramos-Horta, Kuarta (26/10/2022). Foto/GPR

Hafoin hasoru malu ho Prezidente Repúblika, José Ramos-Horta, Kuarta (26/10/2022), CEO Timor Resource, Sullen Osborne relata kona-bá hasoru malu ho Prezidente Repúblika hodi hato’o relatóriu sobre atividade ne’ebé Timor Resource halo iha tasi mane no mós hato’o esplorasaun ne’ebé mak Timor Resource halo no mós servisu ne’ebé mak halo ne’e hamoris ka fó servisu bá Timor-oan sira hamutuk ema besik 550 ne’ebé mak servisu iha ne’ebá.

Timor Resource mós mai hato’o sira-nia vizaun  kona-bá dezenvolvimentu ne’ebé bele halo iha ne’e, kona-bá harii fabrika atu bele kria tan oportunidade bá empregu.

“Progresu servisu iha tasi mane oras ne’e daudaun ami hala’o tiha ona perfurasaun iha mina matan rua no agora daudaun ami iha terseiru perfurasaun iha metru 1300 nia kle’an maibé ida ne’e postu ida ne’ebé kle’an iha ami nia planu ka programa iha Timor-Leste nia to’o agora posu la kle’an too ida ne’e ami sei perfura too metru 3300,” Sullen Osborne hateten.

Advertisement

Timor Resource too agora servisu ne’ebé mak empreza ne’e hala’o iha koordenasaun no servisu hamutuk ho órgaun reguladór Autoridade Nasionál Petroleum no Mina-rai (ANPM).

Too oras ne’e, atividade hirak ne’ebé Timor Resource halo ne’e nia Submisaun autorizasaun ba ANPM no mós hetan aprovasaun sira ba pedidu.

Oras ne’e daudaun Timor Resource iha faze esplorasaun nian, ne’e mak Timor Resource haree katak mina-matan ne’ebé oras ne’e daudaun fura ne’e iha poténsia maibé ida ne’e sei hein tan hodi hala’o tiha teste haree sobre kapasidade ba iha produsaun.

Na’in bá Empreza Timor Resource ne’e  hatutan, atu hato’o katak daudaun ne’e tempu iha Timor nia ne’e tempu ne’ebé hanesan osan tanba iha oportunidade la’ós de’it kona-ba mina nian maibé oportunidade sira seluk bele mosu hanesan mós loke fábrika no hala’o tan servisu sira seluk ne’ebé bele loke kampu traballu.

“Prezidente Repúblika ema ne’ebé iha vizaun maka’as tebes mundu tomak haree nia kapasidade no rona mós nia, hare hotu nia vizaun ne’ebé hanesan hotu Timor Resource nia,” Nia subliña.

Advertisement

Jornalista: Vito Salvadór