Hatutan.com, (31 Jullu 2023), Díli–Projetu konstrusaun edifísiu foun Tribunál Judisiál Primeira Instánsia Díli (TJPID) ne’ebé hahú hatuur fatuk-inan iha loron 25 fulan-Novembru 2022 nia estensaun dala-tolu ona. Ninia prosesu pagamentu bá projetu ne’e millaun US $3-resin ona, maibé projetu ninia ezekusaun fíziku foin atinje porsentu  67,70.  

Lee Mós : Konstrusaun Edifísiu Tribunál Dili Atrazu

Projetu Edífisiu foun Tribunál Judisiál Primeira Intánsia Díli foin atinje 67,70%. Foto/Elio dos Santos da Costa

Projetu ne’ebé hala’o hosi empreza ka kontraktor Shadong International Economic and Technical Cooperation Group.R.P hosi Xina ho nia valor millaun US $10.990.769,35 no hetan supervizaun hosi konsultóriu Dacrea In Association with AEC hosi Japaun.  

Kontratu ne’ebé Tribunál Rekursu halo ho empreza vensidor hahú  ninia ezekusaun iha loron  12 fulan-Outubru 2020 no atu remata iha loron 6 fulan-Marsu 2022, katak projetu refere lao durante loron 510.

Ho razaun pandemia Covid-19, empreza konstrutór halo pedidu estensaun bá dala uluk hodi husu atu finaliza obra konstrusaun edifísiu foun Tribunál Judisiál Primeira Instánsia Díli bá fulan-Outubru 2022, maibé la konsege no husu tan estensaun ba daruak hodi muda ba fulan-Maiu 2023 to’o fulan-Jullu 2023.

Prezidente Tribunál Rekursu (PTR), Deolindo dos Santos, Segunda (31/07/20230) iha Ministériu Finansas bá jornalista sira hateten Konstrusaun Edifísiu foun Tribunál Judisiál Primeira Instánsia Díli atinje ona porsentu 67,70 no Governu halo ona pagamentu ba empreza konstrutór Shadong International Economic and Technical Cooperation Group.R.P. ho montante millaun US $3-resin.

Prezidente Tribunál Rekursu (PTR), Deolindo dos Santos ba jornalista sira iha Ministériu Finansas, Aitarak Laran, segunda (31/07/2023) hateten aktualiza mos informasaun kona-bá konstrusaun edifísiu foun Tribunál Distrital Díli ba primeiro-ministro ho nia ekipa tomak.

Nia afirma obra Tribunál Distrital Díli ne’ebé nia orsamentu tau iha fundu infraestrutura maibé Tribunál Rekursu mak ezekuta rasik, konstrusaun atinze ona pursentu 67,70 ne’ebé nia provizaun atu hotu ne’e máximo mais tarde iha tinan ne’e nia rohan.

Kuadru informasaun kona-bá Projetu Edífisiu foun Tribunál Judisiál Primeira Intánsia Díli. Foto/Elio dos Santos da Costa

“Iha kontratu ikus ne’e hateten ona katak ne’e hanesan ultimu estensaun no sei laiha tan estensaun seluk, signifika empreza konstrutor hakarak ka lakohi tenke finaliza iha tinan ne’e nia laran. Hosi orsamentu ne’ebé previstu bá iha konstrusaun edifísiu foun Tribunál Judisiál Primeira Instánsia Díli ne’e Tribunál Rekursu halo ona pagamentu millaun US $ 3-resin, signifika osan bá obra ne’e sei boot no too remata mak foin bele hatene osan ne’e atu bá ne’ebé,” Deolindo dos Santos hateten.

Tribunál Rekursu mós iha rasik ekipa fiskalizasaun ida ne’ebé Prezidente Tribunál Rekursu mak forma, project manager ne’ebé kompostu hosi Tribunál nia ema, Ajénsia Dezenvolvimentu Nasionál (ADN), Obras Públika inklui Komisaun Nasionál Aprovizionamentu (CNA) balun atu bele haree obra ne’e la’o diak ka lae, no mós atu bele asegura osan Estadu nian ne’ebé tau bá iha konstrusaun edifísiu ne’e.

“Ha’u bele garante ba ita-boot sira tamba halo ona adendum dala-rua, no ha’u bele garante katak sei laiha tan estensaun no bainhira iha tan atrazu sei iha konsekuénsia legal ne’ebé hakerek ona iha kontratu,”  Deolindo dos Santos afirma

Edifísiu foun Tribunál Judisiál Primeira Instánsia Díli ne’e konstrui ho medida andár-rua sei kompleta sala audiénsia julgamentu, sala bá serbisu ofisiál justisa, juis, prokuradór, defensór, advogadu no bá sidadaun-sira ne’ebé asesu ba justisa ho espasu dignu.

Jornalista: Vito Salvadór