Hatutan.com, (13 Agostu 2023), Díli-Forsa Mariña Singapura nian hamutuk na’in-108, Sesta (11/08/2023), to’o iha  Timor-Leste hodi hala’o misaun atu estabelese kooperasaun amizade ho FALINTIL-Forsa Defeza Timor Leste (F-FDTL).

Lee Mós: F-FDTL Konklui Marsa FALINTIL hosi Krarás to’o Kairui

Roo militár Singapura nian “RSS ENDURANCE 207” atraka iha Portu Díli. Foto/Elio dos Santos da Costa

Forsa Mariña Singapura nian ne’e ho roo militár “RSS ENDURANCE 207” atraka iha Portu Díli atu servisu hamutuk mós ho F-FDTL bá misaun pás nian, inklui kolabora malu hodi prepara Timor-Leste nia adezaun bá membru ASEAN  iha tinan sira tuir mai ne’e.

Komandante Komponente Navál  F-FDTL Capitão de Mar e Guerra, Higino das Neves, haksolok simu vizita hosi miltár sira Singapura nian iha Timor no bele sai hanesan motivasaun ida bá militár Timoroan sira, liu-liu bá futuru dezenvolvimentu instuisaun FALINTIL-Forsa Defeza Timor-Leste (F-FDTL).

“Ha’u kontente tebes no ita-boot sira-nia prezensa mai iha Timor. Ida-ne’e bele sai hanesan motivasaun bá ami atu dezenvolve ami-nia militár F-FDTL sira iha futuru. Ami dezeja bá ita-boot sira, sesuse nafatin, no fila-fali karik, ho Maromak akompaña imi to’o iha fatin,” Komadante Higino das Neves hateten iha diskursu durante vizita bá roo ahi militár RSS ENDURANCE 207, iha Portu Antigu Dili, Sábadu (12/08/2023).

Iha vizita bá roo ahi militár ne’e, komandante Higino das Neves, Forsa Mariñeiru sira, esplika direta kona-bá fasilidade sira mak  iha roo laran, inklui espesikasaun hosi roo ne’e rasik. Tuir oráriu, Tersa (15/08/2023), Militár Singapura sira-ne’e sei fila-fali bá sira-nia rai.

Jornalista: Rogério Pereira Cárceres