Hatutan.com, (15 Agostu 2023), Díli—Prezidente Repúblika (PR), José Ramos-Horta preokupa tebes tanba iha sidadaun balun sai ona vítima bá kazu tráfiku umanu iha Timor Leste (TL).

Ministru Justisa, Amândio de Sá Benevides.

Tanba ne’e, Xefe Estadu bolu ona Ministru Justisa, Amândio de Sá Benevides ho komisaun kona-bá tráfiku umanu, hodi husu informasaun kona-bá preokupasaun ne’e.

Lee Mós: PNTL Deskobre Rede Tráfiku Umanu Ne’ebé Rekruta Timoroan Bá Servisu Iha Malázia

Durante enkotru, Amândio de Sá Benevides ho Prezidente Komisaun Tráfiku Umanu fó ona informasaun bá Xefe Estadu kona-bá preokupasaun liuliu  Timoroan sira ne’ebé bá rai li’ur atu buka servisu, depois hetan difikuldade tanba hahalok hosi kompañia balun.

“Iha komisaun ida ne’ebé haree kona-bá tráfiku umanu. Kestaun ida-ne’e krime no ita haree estatistika aas kompara Timor ema oitoan. Entaun ita nia ema balun mak iha li’ur ne’ebá, depois sofre hela situasaun la hetan servisu. Entaun ema sira ne’e bele tama rede tráfiku umanu,” Amândio de Sá Benevides hateten iha Palásiu Prezidensiál Nicolau Lobato Bairru-Pité, Tersa (15/08/2023).

Tuir informasaun katak, ema uza Timoroan balun bá servisu forsada ka bele hetan servisu ho pagamentu ne’ebé la tuir padraun inteternasionál.

Xefe Estadu hakarak hatene oinsá Governu nia planu ba oin atu prevene tráfiku umanu, saida mak governu halo ona tinan sira liu bá, saida mak halo iha tinan ida-ne’e, nune’e ema ruma mai karik Xefe Estadu bele iha informasaun atu bele partilla ho parseiru sira.

Servisu investigasaun MJ nian halo hela, hanesan ema sira ne’ebé fó hela promesa dehan atu fó servisu iha li’ur, depois balun ba hela iha Jardim Portugál ne’ebá, ema sira ne’e investiga hela nune’e bele to’o tempu ida sira tenke responsabiliza saida mak sira halo.

Tinan ida-ne’e MJ rezolve ona ema na’in hitu ne’ebé sai vítima bá tráfiku umanu tanba kompañia Timoroan mak lori sira bá serbisu iha Portugál no Malázia, ikus mai sira iha difikuldade bá orsamentu.

Jornalista: Vito Salvadór