Hatutan.com, (17 Agostu 2023), Díli—Primeiru Ministru (PM), Kay Rala Xanana Gusmão bolu atensaun bá instituisaun Polísia Nasionál Timor Leste (PNTL) atu tau-matan bá membru sira hodi serbí loos de’it povu tuir Lei no orden, liuliu husu atu kuidadu didi’ak bainhira jura bá Partidu Polítiku ruma.

Komandante Jeral PNTL, Henrique da Costa hamutuk ho Segundu Komandante Pedro Belo akompana Primeiru Ministru (PM), Kay Rala Xanana Gusmão hasoru-malu ho Estrutura Komandu  iha Sentru Formasaun Polísia Comoro, Kinta (17/08/2023).Foto: GPM.

Xefe Governu bolu atensaun ne’e tanba bainhira membru balun halo juramentu bá Partidu Polítiku ruma, sei halakon totál povu nia fiar bá instituisaun seguransa ne’e.

Lee Mós: Governu Rezolve Uluk Saláriu Membru PNTL Reformadu Na’in-158

Ho ida-ne’e maka Xanana hasoru direta Estrutura Komandu PNTL iha Sentru Formasaun Polísia Comoro, Kinta (17/08/2023) hodi ko’alia direta atu kurize buat ne’ebé konsidera sala.

“Triste tebtebes bainhira rona katak, ajenste PNTL nian ho forsa ka livre vontade ba hamutuk ho Partidu Polítiku ida, ne’e la di’ak. Kuandu hanesan ne’e laiha sidadaun ida mak bele fiar ona imi. Imi tenke independente. Iha imi nia fuan mak hili  partidu A ka B. Maibé, iha imi nia atitude nu’udár ajente polísia  la pertense ba Partidu ida no  la halo polítika. Ohin ita mai hasoru-malu iha ne’e atu kurrize. Servi de’it povu tuir Lei no órden,” Xanana ko’alia ho lian makaas, perante Esturtura Komandu PNTL hosi nasionál to’o munisipál.

Primeiru Ministru (PM), Kay Rala Xanana Gusmão hasoru-malu ho Estrutura Komandu PNTL iha Sentru Formasaun Polísia Comoro, Kinta (17/08/2023).Foto: GPM.

Primeiru-Ministru fó hanoin katak, hasoru malu ida-ne’e la’ós atu kastigu,  maibé atu fó hanoin de’it katak, iha Estadu Direitu Demokrátiku, Polísia, Forsa, Instituisoens Justisa tenke  hanoin metin ida atu orienta sira nia servisu. Hanoin ne’e maka Prinsipu ida ne’ebé mak serbí  de’it povu no rai ida-ne’e.

Xanana repete katak, instituisaun sira seguransa no defeza, iha Estadu Direitu Demokrátiku labele sadere ba partidu ida. Ida-idak nu’udár sidadaun bele iha ninia  eskolla hodi hili ida ne’ebé nia fiar, maibé ba Polísia ho Forsas labele abertamente tama iha Partidu Polítiku.

“Iha Estadu Direitu Demokrátiku,  povu mak iha última desizaun. Ne’e ita haree ona desde 2002,  povu maka hili, povu mak determina, povu mak fó fiar hodi ba ukun ita nia rai. Se o halo sala, povu sei la fó fiar ona. Tanba ida-ne’e maka atu povu bele fó fiar ba ajente polísia no mós ba militár sira, imi tenke hatudu iha públiku katak imi nia missaun atu serbí no proteze, ne’e mak imi nia misaun sagrada,” nia fó-hanoin.

Primeiru Ministru (PM), Kay Rala Xanana Gusmão hasoru-malu ho Estrutura Komandu PNTL iha Sentru Formasaun Polísia Comoro, Kinta (17/08/2023).Foto: GPM.

Hanesan Primeiru-Ministru, Xanana sei tau-matan bá hahalok Polísia nian atu lori Polísia tomak hodi serbís no proteze povu ida ne’e.

Tanba ne’e, ohin Xanana mai iha ne’e la’ós atu halo  moe PNTL, maibé atu hamutuk fó fali konfinasa ba povu hodi bele sente katak, ba futuru  nu’udár ajente Polísia  sei so’e hahalok foer ne’e, tanba karik ema mak obriga, hodi hala’o de’it missaun ida atu serbí no proteze povu ida ne’e.

Iha fatin hanesan, Komandante Jerál PNTL, Komissáriu Polísia Henrique da Costa hateten konsidera prezensa Primeiru-Ministru nian hamutuk ho membru Governu sira iha Sentru Formasaun Polísia fó duni mensajen diak tebes bá PNTL tomak hodi serbí povu tuir de’it Lei no órden.

“Ohin fó atensaun ba Polísia hotu. Xefe Governu hanesan ita nia aman

haree buat ruma la loos fó hanoin atu ita bele fila mai dalan loos no labele monu ba iha manobra ruma. Tamba ne’e maka ho prezensa ne’e sai hanesan motivasaun ida forte ba polísia nune’e ami bele hala’o servisu ne’e ho di’ak liután,” Henrique da Costa hateten.

Primeiru Ministru (PM), Kay Rala Xanana Gusmão hasoru-malu ho Estrutura Komandu PNTL iha Sentru Formasaun Polísia Comoro, Kinta (17/08/2023).Foto: GPM.

Ba oin Komandu kompromete atu tau-matan bá membru hotu-hotu hodi hala’o atendimentu tenke hatudu profisionalizmu, étika komunikasaun ho komunidade no mós entre membru PNTL iha instituisaun laran, bele kria lasu amizade diak liu tán.

Oras-ne’e daudaun membru PNTL ativu hamutuk 4.165 mak hala’o misaun iha Komandu Jerál no mós unidade sira.

Jornalista: Vito Salvadór