Hatutan.com, (10 Outubru 2023), Díli—Diretór Assosiasaun HAK, Feliciano de Araújo husu Ministru Justisa (MJ), Amândio de Sá Benevides tenke hola responsabilidade bo’ot bá nia promessa sira bá povu kona-bá kaderneta pasaporte ne’ebé to’o agora seidauk bele realiza.

Diretór Assosiasaun HAK, Feliciano de Araújo husu Ministru Justisa (MJ). Foto dok privadu Jhano Bin Araújo.

“Ministru Justisa tenke halo klarifikasaun ida ne’ebé serteza bá públiku, tanba saida mak kaderneta passaporte ne’e la mai. Empreza produtór mak laiha kapasidade ka ezijénsia empreza nian bo’ot liu saida mak espetativa Ministériu Justisa nian,” Diretór ezekutivu Assosiasaun HAK, Feliciano de Araújo hateten bá Hatutan.com via telefónika, Tersa (10/10/2023).

Lee Mós: Rezolve Pasaporte, Ministru Amándio Promete Fim Setembru Maibé Xanana dehan La Fásil

Assosiasaun HAK konsidera Governu iha responsabilidade atu fasilita kaderneta passaporte bá sidadaun sira, maibé responsabilidade autoridade ida ne’ebé iha kompeténsia bá ida-ne’e maka Ministériu Justisa no presiza haree didi’ak bá iha Rejistu Notariadu nia pozisaun kontratu ho empreza produtór, tanba bainhira sira la klarifika buat ruma ne’e problema.

Diretór ne’e hatutan, será que kontratu ne’ebé Governu halo ho empreza produtór mak la to’o ou keta iha konkordánsia bá kontratu ne’e mak Governu la tau orsamentu ida klaru tanba kaderneta passaporte ne’e iha hela, iha ho sentidu Timor-Leste halo ona produsaun antes ne’e, tanba saida mak empreza produtór labele imprime.

“Ida-ne’e refere fila-fali bá kontratu ne’ebé iha. Ministru Justisa la brani atu foti desizaun. Será que iha kontratu ne’e iha buat ruma mak la loos, tanba ema balun hakarak han boot liu no balun han ki’ik liu, ne’e mak ema lakohi atu prosesa no Ministru Justisa iha buat rua nia laran. Ida, dilemátiku no ida seluk maka laiha korájen atu foti desizaun,” nia hateten.

Tamba ne’e, HAK husu Ministru Justisa tenke revee fila-fali kontratu ho empreza produtór no Ministru Justisa tenke iha responsabilidade bá Primeiru-Ministru no tenke hateten buat loos.

Kona-bá ne’e, Jornalista tenta halo konfirmasaun direta ho Ministru Justisa, Amândio de Sá Benevides iha Aeroportu Internasionál Prezidente Nicolau Lobato Comoro, Tersa (10/10/2023), maibé Governante ne’e dezvia hosi jornalista sira no ho emosaun responde jornalista sira katak prossesu normál.

“Passaporte ne’e nia prossesu normál no imi ezije bebeik kona-bá promessa, husu bá promessa,” Ministru Justisa Amândio de Sá Benevides hatán bá jornalista sira ho hirus.

Iha diskursu pose bá membru IX Governu Konstitusionál iha 01 fulan Jullu tinan ne’e, Primeiru Ministru (PM), Kay Rala Xanana Gusmão hateten, Governu sei halo ezersísiu ba Orsamentu Retifikativu maka mantein ho orsamentu orijinál iha Orsamentu Jerál Estadu (OJE) 2023 ho nia montante billaun $2.1, ne’ebé sei utiliza hodi rezolve problema ai-moruk, problema passaporte inklui vítima dezastre naturál durante loron 120.

Iha loron 04 fulan Jullu tinan ne’e, Ministru Justisa (MJ), Amândio de Sá Benevídes  promete mós katak, karik iha ona garantia maka iha loron 120, kaderneta passaporte bele to’o ona Timor.

Iha Tersa 15 Agostu 2023, Ministru Justisa, Amândio de Sá Benevides informa tán hodi fó garantia bá Prezidente Repúblika (PR), José Ramos-Horta iha Palásiu Prezidensiál Nicolau Lobato Bairru-Pité, katak,  
prossesu akizasaun bá kaderneta passaporte remata ona no kompañia manán-na’in iha Finlándia halo hela imprime no iha ona serteza katak, fulan Setembru nia rohan kaderneta 16.000 to’o ona Timor-Leste.

Iha fim fulan Setembru foin lalais ne’e mós Ministru ne’e promete tán liu hosi média katak, iha inisiu fulan Outubru, kadernete Passaporte sei to’o iha Timor Leste maibé, ohin tama ona ba loron 10 fulan Outubru, no seidauk iha informasaun ka novidade ruma kona-bá promessa ne’e.

Jornalista: Vito Salvadór