Hatutan.com, (10 Outubru 2023), Díli— Polítika Governu nian atu responde preokupasaun populasaun iha kona-bá folin foos ne’ebé sa’e makás iha fulan tolu ikus ne’e, no konsege fa’an ona iha munisípiu Viqueque ho Ermera maibé fa’an de’it iha parte vila, hodi la konsege fa’an to’o iha aldeia, nune’e parte Centro Logistica Nacional (CLN) defende-an katak, impossível atu fa’an to’o aldeia tanba atende ema ema barak liu inklui limitasaun bá transporte.

Diretór ezekutivu CLN, Jacinto Paijo.

Diretór ezekutivu CLN, Jacinto Paijo esplika, foos ne’ebé Governu fa’an ne’e fó liu hosi autoridade lokál no kada munisípiu ho kuota saka 2.000, iha ne’ebé hahú ona hosi munisipiu Viqueque, kontinua bá Ermera, sei liu bá  Bobonaro no bá munisipiu sira seluk to’o loron 27 Novembru remata iha Ataúro.

Lee Mós: Foos Saka 2.000 Ne’ebé CLN Fa’an, La Konsege Responde Nesesidade Populasaun Viqueque

“Foos ne’ebé ita distribui labele to’o aldeia, tanba ne’e impossível. Ita mós atende ema barak la’ós ema ida rua de’it,” Jacinto Paijo hateten iha salaun enkontru MAP Komoro, Tersa (10/10/2023).

Diretór CLN ne’e dehan, kona-bá stock ne’ebé iha tuir kbiit  Governu nian hodi halo intervensaun bá primeira faze.

Tanba ne’e, CLN mós haree katak, klaramente problema hotu-hotu labele rezolve dala ida no produtu ne’ebé iha labele responde ema hotu-hotu, no ida-ne’e mak kondisaun Governu nian.

“Husu bá hotu-hotu ita pasiénsia tanba ita nia fo’os ne’e la’ós ba ema hotu-hotu, maibé bá ema sira ho klase médiu nian mai okos ne’e mak ita nia Governu nia planu atu responde,” nia hateten tán.

Dau-daun ne’e CLN hala’o hela faze dahuluk, bazeia bá Dekretu Lei ne’ebé la’o hela, ho tarjetu tuir Dekretu Lei ne’e ba loron 180 to’o 27 Novembru, depois bá oin bele la’o tanba kompañia importadór sira mós garantia hela.

Kona-bá planu sosa foos importadu hodi substitui foos lokál, ne’e diretór CLN seidauk bele fó komentáriu tanba ne’e kompeténsia Governu nian.

Antes ne’e Administradór Postu Administrativu Ossu, Sebastião Pereira Pires konsidera programa Governu nian liu hosi Centro Logistica Nacional (CLN) fa’an foos 25kg ho folin $12 hamutuk saka 2.000 iha munisípiu Viqueque ne’e di’ak atu hakmaan problema komunidade perante foos folin sa’e, maibé falla iha implementasaun tanba mobilizasaun foos hosi CLN to’o de’it Viqueque Vila no la tama to’o  iha área rurál, nune’e populasaun kontinua halerik.

Jornalista: Leopoldina de Carvalho