Hatutan.com, (09 Outubru 2023), Díli—Governu liu hosi Centro Logistica Nacional (CLN) fa’an ona foos 25kg ho folin $12 hamutuk saka 2.000 iha munisípiu Viqueque durante loron tolu hahú hosi loron 04 to’o 06 fulan ne’e, maibé la sufisiente atu responde nesesidade komunidade liuliu suku no aldeia sira ne’ebé pertense bá área rurál.

Foos iha armajenamentu CLN nian iha Tibar, Liquiça, atu fa’an ho presu $12.00 kada saka 25kg bá povu iha terítoriu nasionál. Foto/Elio dos Santos da Costa.

Administradór Postu Administrativu Ossu, Sebastião Pereira Pires konsidera programa Governu nian ne’e di’ak atu hakmaan problema komunidade perante foos folin sa’e, maibé falla iha implementasaun tanba mobilizasaun foos hosi CLN to’o de’it Viqueque Vila no la tama to’o  iha área rurál, nune’e populasaun kontinua halerik.

Lee Mós: CLN Fa’an Ona Foos $12 Iha Viqueque no Ohin Kontinua bá Ermera

Sebastião Pereira Pires  dehan, depois de lansamentu distribuisaun foos iha aremajen Tibar nian iha loron 02 fulan ne’e, CLN  lori duni iha munisípiu Viqueque no simu direta hosi Administradór Munisípiu, no ba fa’an duni iha postu administrativu Ossu maibé iha vila de’it.

“Ami rona duni dehan foos mai fa’an iha ne’e. Governu mak distribui maibé ha’u la haree foos ne’e sira atu fa’an ba se. Ha’u la hatene maibé ha’u rona dehan guvernu sira mai fa’an ho 25kg ho $12 kada saka. Ne’e la sufisiente.Populasaun iha ne’e persiza duni foos atu sosa, maibé lori 2.000 sakas de’it entaun ne’e la sufisiente,” Sebastião Pereira Pires hateten bá Hatutan.com via telefónika, Segunda (09/10/2023).

Administradór ne’e dehan, CLN mai fa’an ho stock limitadu iha de’it vila ne’e populasaun balun de’it mak sosa, no realidade iha área rurál hanesan suku Waibobo, Nareka, Ossu-rua, Waigia, Liaruka, Builale la konsege sosa maski sira ne’e mak presiza liu tanba sira iha liu área rurál kompara ho sira iha vila.

Populasaun iha Munisípiu Viqueque hamutuk 7.000-resin no Governu lori de’it mak saka 2.000 entaun komunidade barak mak la hetan duni.

Tanba ne’e, nia husu bá Gobvernu liuliu CLN katak, foos ne’e sei iha karik haruka de’it mai iha postu administrativu, depois mak jere nune’e ema hotu-hotu bele hetan.

“Se hanesan ne’e, bebeik ema no ema barak mak konfuzaun ho programa Governu nian ne’e tanba sustenta de’it ema balun,” nia hateten.

Nune’e mós Xefe Suku Nahareka, Nazário Soares Fernandes ba Hatutan.com inforama katak, suku ne’e iha aldeia lima mak hanesan Darenau, Macabu’u, Maurate, Raila-a no Samarogo ho totál uma-ka’in 675 no populasaun 2.778.  

Xefe Suku ne’e dehan, ninia populasaun ne’e iha nesesidade boot tebes liuliu presiza tebes foos, tanba fulan hira ona mak populasaun hola foos ho folin karun tebes kada saka $20.

Tanba ne’e hanesan autoridade lokál kontente ho programa Governu nian, atu fa’an foos hodi hakmaan netik komunidade iha suku ne’e maibé foin lalais CLN fa’an la lori too iha suku Nahareka no fa’an de’it iha Ossu.

“Ha’u nu’udar autoridade lokál lori ha’u nia komudade nia lian hato’o ami nia rekomendasaun ba Governu atu oinsa bele lori foos to’o ami nia fatin. Tanba ami nia suku ne’e dook liu hosi vila no estrada mós aat tebtebes,” Xefe Suku ne’e hateten.

Durante ne’e negosiante hosi parte Kelikai, Ossu no Venilale mak baibain bá fa’an iha suku ne’e maibé ho folin karun tebes, nune’e ba ferik ho katuas sira ne’ebé mak ho idade avansadu ona susar tebes ba osan atu bele hola foos ho presu boot hanesan ne’e.

Iha Ermera Fa’an De’it bá Vulnerável Sira

Hosi parte Munisípiu Ermera, Prezidente Autoridade Munisípiu (PAM) Eusébio Salsinha informa katak, nia simu ona informasun hosi parte CLN kona-bá distribuisaun foos bá munisípiu ne’e.

Tanba ne’e nia dehan, iha loron 09 fulan ne’e foin mak transporta hosi armajen Tibar bá tau hamutuk iha Gleno no Admistrasaun munisipiu Ermera sei fahe fali karreta sira ne’e ba postu adminstrativu ne’en mak hanesan Railaku, Ermera-vila, Hatulia, Lete-foho, Atsabe no Hatulia B.

Tuir ida-ne’e sei tula ba  konsentra hotu iha postu admistrativu idak-idak, depois mak halo anunsia atu komunidade ba hola iha postu admistrativu tanba foos hirak ne’e sei la to’o suku idak-idak tanba CLN meius mak la to’o duni.

“Dadus hosi PAM Ermera, totál polulasaun hosi postu admistrativu ne’en hamutuk 138.000 tuir rezultadu sensus 2023. Maibé foos saka 2.000 ne’e sei distribui de’it ba ema vulnerável, sira ne’ebé laiha kbiit ba Dili atu sosa,” Eusebio Salsinha informa hateten ba Hatutan.com liu husi telefónika, Segunda (09/10/2023).

Nia sei husu bá Xefe suku sira tenki bá aviza bá komunidade katak la fa’an bá publiku no  Xefe suku sira iha ona dadus kona-bá kondisaun komunidade idak-idak iha nia munisipiu.

Eusebio Salsinha konsidera politika Governu nian hodi fa’an foos ho folin barratu ne’e nu’udár politika diak ida, tanba bele ajuda ona povu kbi’it laek sira ne’ebé labele sosa.

Foos hirak ne’ebé sei lori ba postu admistrativu ne’e sei tula diretamente hosi karreta ne’ebé mak Ministériu Komérsiu Indústria  prepara dau-daun ho total karreta 8.

Iha sorin seluk xefe aldeia Taklela, Suku Poetete, postu admistrativu Ermera-vila, Mario Fátima de Deus informa nia seidauk hetan informasaun kona-bá foos ne’ebé mak Governu liu hosi MKI fa’an ho folin $12 ba kg25.

“Ami seidauk simu informasaun kona-bá ne’e. Maibé kontente tanba se tebes duni entaun sei tulun tebes komunidade ne’ebé presiza tanba agora foos folin karun duni,” Xefe Aldeia Taklela, Mário Fatima de Deus hateten bá Hatutan.com liu telefónika, Segunda (09/10/2023).

Aldeia Taklela, iha totál xefe familia 290 ho abitante hamutuk 1000-resin, barak liu hela iha area rurál ho kondisaun estrada aat tebes.

Jornalista: Leopoldina de Carvalho/Estajiáriu Lazaro Pereira Quefi