Hatutan.com, (10 Outubru 2023), Díli—Desde ukun an to’o ohin loron, sistema bá tratamentu dokumentu importante sira hansan Billete Identidade (BI), Sertidaun Repúblika Demokrátiku Timor Leste (RDTL), Sertidaun Kazamentu no Sertidaun Óbitu (Mate) iha Diresaun Munisipál Konservatóriu Servisu Rejistu Notariadu Díli kontinua komplikadu tanba deskonfia mós iha funsionáriu broker sira iha diresaun ne’e mak sai impedimentu no presiza investigasaun kle’an hodi hadi’a Sistema ne’e.

Sidadaun sira forma hodi trata Billete Identidade (BI), Sertidaun Repúblika Demokrátiku Timor Leste (RDTL), Sertidaun Kazamentu no Sertidaun Óbitu (Mate) iha Diresaun Munisipál Konservatóriu Servisu Rejistu Notariadu Díli, Tersa (10/10/2023). Foto: Tomé da Silva.

Sidadaun ida ne’ebé lakohi publika ninia naran loloos ko’alia bá jornalista Hatutan.com iha edifísiu Diresaun Munisipál Konservatóriu Servisu Rejistu Notariadu Díli nian katak, nia mai iha ne’e atu trata de’it ninia Billete Identidade maibé hasoru problema boot tanba, tenke mai dadeer-san no forma naruk, dudu malu maibé seidauk konsege hetan tanba funsionáriu sira iha laran, fó prioridade liu bá sira ninia maluk broker sira ne’ebé leva mapa sanulu ba leten hodi fó liu tratamentu uluk.

Lee Mós: Abitante Sira Forma Naruk no Hein Kleur Trata BI ho Sertidaun RDTL

Sidadaun ne’e mós esplika katak, buat ne’ebé nia observa, funsionáriu iha laran sai mai haree ema barak forma hela, maibé nia uza kode hodi bolu broker maluk sira na’in tolu to’o haat leva mapa 10 to’o 10-resin tama liu, no sira fó osan bá malu iha laran hafoin sira telephone malu lakleur ema oin foun mai no  tama liu hasai foto no sai fali mai.

“Ami sira ne’ebé forma ne’e forma nafatin iha ne’e. Balun buka ai-mahon, hodi helik hosi loron manas, balun to’o fila tiha ba uma,” nia hateten ba jornalista Hatutan.com iha edifisiu Diresaun Munisipál Konservatóriu Servisu Rejistu Notariadu Díli, Tersa (10/10/2023).

Nia hatutan, bainhira oras to’o atu han meiudia, funsionáriu ne’e sai mai hodi aviza dehan mai fali tuku rua loraik, no pasiénsia tenke latan  hela dokumentu sira iha rai no bá buka hahan hodi fila fali mai forma iha loron manas.

Sidadaun ne’e triste tebes ho Sistema atendimentu ida ne’e no konsidera Sistema ne’e hanesan Sistema aat liu iha mundu no tuir nia tenke halakon tanba nasaun ne’e oras ne’e daudaun broker sira mak jere.

“Tenke investiga didi’ak tanba funsionáriu sira ne’e mós simu osan hosi broker sira. Signifika, funsionáriu sira ne’e mesak broker de’it. Ministru Justisa labele dukur. Ukun rai ne’e tenke transparente, hadi’a Sistema. Tenke iha kontrolu ne’ebé forte ba funsionáriu sira atu serbisu ho loloos tanba sira ne’e Estadu selu sira hodi hala’o atendimentu ida dignu bá sidadaun hotu,” nia hateten.

Sidadaun sira forma hodi trata Billete Identidade (BI), Sertidaun Repúblika Demokrátiku Timor Leste (RDTL), Sertidaun Kazamentu no Sertidaun Óbitu (Mate) iha Diresaun Munisipál Konservatóriu Servisu Rejistu Notariadu Díli, Tersa (10/10/2023). Foto: Tomé da Silva.

Iha fatin hanesan, sidadaun Rofina Matos Barreto ne’ebé mós trata ninia  dokumentu bá Hatutan.com espressa ninia sentimentu triste tanba tenke forma no dudu-malu, tanba ne’e nia husu bá Ministériu Justisa (MJ) atu estabelese  Servisu Rejistu Notariadu iha kada suku hodi bele fasilita diak liu tan komunidade.

“Ita atu trata dokumentu tenke forma, dudu-malu, haksesuk-malu, ate maluk sira balun dalaruma tenke fila de’it,” nia hateten.

Rofina Matos Barreto  rasik forma iha edifisiu nia oin hahú kedan tuku 5:00, molok funsionáriu sira to’o, hodi hein atu foti númeru formatura, nune’e forma tiha bainhira númeru to’o, tama ba chek dokumentu, bainhira tama mak dokumentu seida’uk kompletu, tenke fila hodi hadi’a hafoin lori fila-fali, letra ida de’it mak sala mós tenke fila.

“Situasaun sira naruk, dudu malu, ne’e la’os foin maka akontese, bebeik ona, tuir loloos ho problema sira ne’e Ministru Justisa  tenke haruka ekipa Notariadu tun direitamente ba iha suku hodi halo atendimentu iha suku de’it,” nia sujere.

Nune’e mós sidadaun Jaime Ximenes da Silva kestiona sistema atendimentu funsionáriu servisu notariadu nian tanba konsidera halimar liu ho tempu ne’ebé tuir loloos nia konsidera fásil hela funsionáriu sira rezolve mós tenke haruka ema fila bá fila mai.

Kona-bá preokupasaun ne’e, Jornalista Hatutan.com konfirma kedan ho Diretora Sevisu Notariadu Munisípiu Díli, Ana Maria da Conceição, infelizmente labele fó komentáriu tanbá la hetan autorizasaun hosi Diretór Jerál Servisu Notariadu.

“Ha’u labele fó komentáriu tanba la hetan autorizasaun hosi Diretór Jerál. Bainhira  nia fó lisensa bá ha’u atu ko’alia mak ha’u foin bele ko’alia hodi fó informasaun. Agora nia la autoriza entaun ami labele fó-sai informasaun sira,” nia hateten.

Jornalista Hatutan.com observa iha terrenu nota katak, sidadaun sira forma naruk desde dader tuku 07:00, iha edifísiu oin, hadau malu no dudu malu to’o balun trata malu.

Jornalista: Gloria Maia