Hatutan.com, (11 Outubru 2023), Díli—Governu reitera kompromissu hodi kompleta prossesu akizisaun kaderneta Passaporte Eletróniku (ePassport) ho lais liután, no informa katak, prosesu ne’e iha ona ninia faze finál ho pakote dahuluk ne’ebé entrega ona bá grupu prioritáriu sira.

Pasaporte komún ho pasaporte servisu RDTL . Foto/Hatutan.com

Iha tinan 2015, Ministériu Justisa selebra ona kontratu ida hodi fornese unidade kaderneta ePassaport hamutuk rihun 150, ne’ebé entrega ona hosi tinan 2016 to’o 2019.

Lee Mós: Rezolve Pasaporte, Ministru Amándio Promete Fim Setembru Maibé Xanana dehan La Fásil

“Ho hanoin katak, estimasaun bá impresaun anuál kaderneta ePassaport nian iha Timor-Leste maka unidade rihun 20, prevee katak stock ne’e sei garante iha tinan 2022 to’o 2023,” Hatutan.com sita  komunikadu, Kuarta (11/10/2023).

Iha tinan 2022, inisia ona prossesu aprovizionamentu foun ida bá akizisaun kaderneta ePassaport, prossesu ne’e labele realiza tanba difikuldade prosesuál sira.

Iha finál tinan 2022, hafoin aeroportu loke fila-fali depois COVID-19, mosu aumentu solisitasaun bá emisaun passaporte liu média no la espera, nune’e maka hamosu fallansu iha prossesu emisaun passaporte nian.

Nune’e, iha inísiu tinan 2023, Ministru Justisa selebra kontratu ida atu fornese unidade kaderneta ePassaport hamutuk 73.150, ne’ebé la kumpre tanba difikuldade prosesuál.

Atu solusiona situasaun ne’e, Governu Konstitusionál IX ho desizaun Konsellu Ministru loron 27 fulan-setembru tinan 2023, kona-bá aprovasaun atu ajusta direitu ne’ebé urjente, fó kontinuidade bá prossesu aprovizionamentu atu adjudika akizisaun bá kaderneta Passaporte Eletróniku.

Pakote dahuluk passaporte bá teste (pilotu) iha ona Díli no tuir akordu ho relatóriu kona-bá impresaun passaporte sira ne’e, rejista katak passaporte ne’e emite ona ho sussesu.

“Hosi passaporte dahuluk ne’ebé simu ona ho totál passaporte 174, fó prioridade atu entrega bá pasiente sira ne’ebé presiza evakuasaun médika bá estranjeiru no sira ne’ebé akompaña, estudante, atleta no grupu prioritária sira seluk. Tuirmai, simu ona unidade balun ho totál ezemplár 700, ne’ebé sei distribui bá grupu prioritária sira. Faze tuir-mai, prevee iha tempu badak, sei mai unidade barak liután,” Hatutan.com sita Komunikadu.

Nune’e, prosesu akizisaun kaderneta passaporte eletróniku nian iha ona faze finál no hein de’it tuir faze pakote bá kaderneta ne’ebé haruka mai Timor-Leste ho totál ne’ebé prevee ona maka iha unidade 73.840. 

Jornalista: Vito Salvadór