Hatutan.com, (20 Outubru 2023), Riyadh— Árabia Saudita liu hosi Primeiru-Ministru (PM) Prínsipe Muhammad bin Salman Alu Saud hatudu ninia prontidaun atu apoia dezenvolvimentu Timor-Leste liu hosi fó empréstimu ho funan kiik.

Prezidente Repúblika, José Ramos-Horta ho delegasaun hasoru-malu ho Primeiru-Ministru (PM) Árabia Saudita Prínsipe Muhammad bin Salman Alu Saud iha Provínsia Riyadh, Otél The Ritz-Carlton, Sesta (20/10/2023). Foto: PR.

Prínsipe Árabia Saudita Muhammad bin Salman Alu Saud ne’ebé assume mós kargu no responsabilidade hanesan Prezidente Konsellu Assuntu Ekonómiki no Dezelvolvimentu ne’e, konfirma bá Prezidente Repúblika José Ramos-Horta bainhira líder nasaun rua ne’e hasoru malu iha, Provínsia Riyadh, Otél The Ritz-Carlton, Sesta (20/10/2023).

Lee Mós: Arábia Saudita Prontu Apoia Dezenvolvimentu TL

“Ohin ami rua ko’alia, sira sei oferese no apoia Timor-Leste. Prínsipe hateten sira prontu iha saida de’it mak Timor-Leste presiza no hakarak. Sira prontu atu halo buat hotu atu apoia liuliu atu fó emprestimu,” Ramos-Horta hateten.

Xefe Estadu informa mós ba Xefe Governu Arábia Saudita katak bainhira fila bá Timor-Leste sei ko’alia ho Primeiru-Ministru Kay Rala Xanana Gusmão, atu buat sira ne’ebé ko’alia iha ne’e, kona-bá promessa, oferta no buat barak ne’ebé nasaun sira hakarak halo ho seriedade ne’e, Primeiru-Ministru mak tenke haree.

“Se Governu hakarak duni hametin relasaun ho rai sira ne’e, hakarak halo kooperasaun ne’e desizaun politika. Oportunidade mak ida-ne’e,  odamatan nakloke atu Timor-Leste hametin relasaun ho nasaun sira ne’e, Governu Timor-Leste mak defini prioridade no modalidade sira. Ha’u prefere di’ak liu ita haree mak empréstimu tanba sira nia funan ne’e simbóliku de’it,” Ramos-Horta informa.

Ho emprestimu sira ne’ebé funan ki’ik, Ramos-Horta dehan, Timor-Leste la presiza foti osan hosi fundu petrolíféru, tanba investimentu Timor-Leste nian iha fundu petrolíféru ne’e oferese funan aas bá Timor-Leste iha merkadu internasionál.

Empréstimu ne’ebé nasaun sira ne’e oferese bá Timor-Leste bele utiliza ba halo infraestrutura edukasaun no saúde, liu-liu hadi’a eskola sira, halo klinika, halo estrada no hadi’a merkadu sira ne’ebé sei tulun povu Timor-Leste.

Enkontru entre Prezidente Repúblika José Ramos-Horta ho Primeiru-Ministru Árabia Saudita Prínsipe Muhammad bin Salman Alu Saud ne’e akompaña mos husi Vise-Ministra Assuntu ASEAN Milena Rangel no delegasaun sira hosi Timor-Leste.

Jornalista: Vito Salvadór