Hatutan.com (09 Novembru 2023), Díli— Iha tetu Orsamentu Jerál Estadu (OJE) bá tinan 2024, Ministériu Finansas (MF) atribui millaun $2.4 bá Gabinete Primeiru-Ministru (GPM).

Xanana hahú hala’o servisu iha Palásiu Governu, Díli, Segunda (03/07/2023). Foto/Elio dos Santos da Costa.

Tuir planu, orsamentu hirak ne’e sei fó prioridade bá programa Fronteira Marítima ho rai viziñu sira, kontinuasaun projetu tasi-mane inklui implementa polítika nasaun nian.

Lee Mós: KM Aprova Rezolusaun Hodi Define Kompozisaun Komité Revizaun Polítika OJE 2024

“Hosi proposta ne’ebé mak ministériu finansas distribui hanesan pakote kada tinan, Gabinéte Primeiru Ministru hetan millaun $2.4. Entaun, desizaun hosi Primeiru Ministru, ita tenke kumpre pakote,” Diretora Jerál Gabinete Primeiru-Ministru, Úrsula Ferrão Pinto hateten hafoin partisipa iha Komité Revizaun Orsamentu, iha Salaun Ministériu Finansas, Díli, Kinta (09/11/2023).

Nia dehan, bazeia bá programa ne’ebé mak hanesan iha IX Governu hatuur ona, iha ne’ebá prioridade liu maka atu haree kona-bá Fronteiras Marítimas, depois kona-bá Tasi-mane nomós ho polítika nasaun nian.

Durante halo aprezentasaun bá tetu orsamentu Gabinéte Primeiru-Ministru nian, PM Xanana Gusmão husu atu aumenta tán osan adisionál ho montante rihun hitu-resin, hodi bele utiliza bá viajen estranjeiru.

“Iha desizaun, Primeiru Ministru husu adisionál $700.000 bá viajen estranjeiru, nune’e totál millaun $3.1,” Úrsula Ferrão esplika.

Jornalista: Rogério Pereira Cárceres