Hatutan.com (15 Novembru 2023) Díli—Tribunál Rekursu (TR) laiha kompeténsia kona-bá prepara kondisaun bá uma-ka’in hitu (7) ne’ebé hetan evikasaun iha área Becusse kraik, suku Becora, postu administrativu Cristu Rei, munisípiu Díli.

Prezidente Tribunál Rekursu (PTR), Deolindo dos Santos hasoru-malu ho Prezidente Repúblika, José Ramos-Horta, iha Palásiu Prezidensiál, Bairru-Pité, Kuarta (15/11/2023). Foto: Elio dos Santos da Costa.

Prezidente Tribunál Rekursu (PTR), Deolindo dos Santos konsidera problema atu kria kondisaun hanesan atu halo uma bá família sira ne’ebé hetan eviksaun ne’e servisu Governu nian la’ós Tribunál.

Lee Mós: Xanana Abandona Reuniaun KROP, Intervein Desizaun Tribunál

“Ha’u laiha komentáriu bá ida-ne’e tanba la’ós kompeténsia Tribunál mak atu kria kondisaun. Ne’e Governu mak bele haree ida-ne’e. Tribunál laiha kompeténsia bá materiál ida-ne’e,” Deolindo dos Santos hateten hafoin enkontru ho Prezidente Repúblika (PR), José Ramos-Horta iha Palasiu Prezidensiál Bairru-Pité, Kuarta (15/11/2023).

TR rasik seidauk iha hanoin atu ko’alia ho Primeiru Ministru (PM), Kay Rala Xanana Gusmão liga ho problema refere, tanba TR ne’e nia pronunsia liu hosi desizaun, labele  ho simplesmente TR  ko’alia ne’e la’e.

“Tribunál Rekursu ho nia juiz sira nia intervensaun atraves prossesu de’it, la’ós atu ba ko’alia la’e,” PTR deklara.

Iha Sesta (10/11/2023) Xanana Gusmão ho hirus abandona reuniaun Komisaun Revizaun Orsamentu Polítika (KROP) tanba rona informasaun kona-bá desizaun Supremu Tribunál Justisa ne’ebé hasai uma-kain hitu (7) ne’e tanba konsidera desizaun Tribunál nian dezumanu no la kria kondisaun bá família hirak ne’e, Deolindo dehan hanesan PTR lakohi atu emite opiniaun.

Deolindo dehan, prossesu sira ne’ebé la’o ne’e nia nu’udár Prezidente Tribunál Rekursu, labele emite opiniaun ba kazu sira hanesan ne’e no hanesan Konsellu Superiór majislatura, nia pozisaun iha tiha ona.

“Kuandu ita ko’alia kona-bá ezekusaun, ne’e ita la ko’alia ona Tribunál Primeira Instánsia. Tribunál Rekursu atu haree fali la’e. Ne’e iha ona faze ezekusaun Primeira Instánsia,” nia hateten.

Jornalista: Leopoldina de Carvalho