Hatutan.com, (10 Novermbru 2023), Díli– Ministériu Justisa (MJ) sei aprezenta proposta bá Konsellu Minsitru (KM) hodi aprova Kódigu Rezistu Sivil ne’ebé maka molok ne’e iha tinan 2007 Kuartu Governu Konstitusionál to’o Oitavu Governu Konstitusional deskute ona, maibé seidauk aprova.

Lee Mós: PN Sei Kria Lei Kódigu Rejistu Sivíl Atu Labele Diskrimina Relijioza Seluk

Vise-Ministru Justisa, Paulo Manuel da Silva dos Remédios  hateten Kódigu Rejistu Sivil ne’e presiza atu  labele halo deskriminasaun bá relijioza seluk ne’ebé la’ós katolika hodi hetan tratamentu hanesan bá hetan sertidaun RDTL, sertidaun kazamentu RDTL ho sertidaun Óbitu.

Selebrasaun loron Galungan hosi komunidade hinduísmu iha Pura, Taibessi, Díli. Foto/Elio dos Santos da Costa

“Ha’u mós akompaña situasaun ida-ne’e, iha tinan 2007 to’o agora, iha Komisaun Minsitériu Justisa ida bá hakerek Kódigu Rejistu Sivil, maske deste tinan 2007 mai to’o ohin loron, iha komisaun bá ida-ne’e, maibé ita-nia Governu hahú hosi Kuartu Governu Konstitusionál mai to’o Oitavu Governu Konstitusionál ne’e seidauk aprova Kódigu Rejistu Sivil, atu labele deskrimina relijiozu sira iha nesesidade bá asesu sertidaun RDTL,” Vise-Ministru Justisa, Paulo Manuel da Silva dos Remédios haktuir bá Jornalista sira iha Salaun Ministériu Justisa, Sesta (10/11/2023).

Nia informa Kódigu Sivil hateten ona, tanba ne’e agora nia parte halo proposta ida hato’o bá Konsellu Minsitru, atu aprova dekretu lei, nunee haree bá too iha fulan-Dezembru 2023 posivel Governu bele hahú halo ona konsulta públiku  ho sosiedade sivil sira hanesan, ALFELA, JSMP no sira seluk kona-bá proposta ka ezbosu dekretu lei iha Kódigu Rejistu Sivil.

“Ita atu haree oinsa labele halo deskriminsasaun bá sidadaun ne’ebé mai ho relijiaun saída deit, tanba la’ós iha Kódigu Sivil ne’e deit maka ko’alia, maibé iha ita-nia Konstitusaun RDTL mós hateten momos ema hotu nia direitu, liu-liu oinsá atu bele asesu livre bá trata dokumentu hanesan sertidaun RDTL, Billete de Identidade no Sertidaun Óbitu,” nia informa.

Daudaun ne’e seidauk iha Kódigu Rejistu Sivil, tanba ne’e MJ halo ona proposta to’o fulan-Dezembru komesa ona halo konsultasaun públiku ho sosiedade sivil molok lori bá Konsellu Minsitru atu aprova.

Governu dalimak liuhosi Ministeriu Justisa (MJ) prepara ona ezbosu lei Kódigu Rejistu Sivil. Lei ida importante tebes atu implementa regra balun hosi Kodigu Sivil ne’ebé aprova ona iha 2011, liu-liu regra sira kona-bá rejistu bá moris (Sertidaun RDTL), kazamentu (Sertidaun Kazamentu RDTL) no rejistu mate (Sertidaun Óbitu) nian.

Tempu ne’ebá halo ona konsulta públiku kona-bá esbosu Kódigu Rejistu Sivil ne’e ho artigu hirak mak hakerek iha Lei refere. Konsulta  publiku ne’e hanesan parte importante ida hosi partisipasaun povu nian iha prosesu dezenvolvimentu nasional, liu-liu iha parte justisa nian.

Lee Mós: Governu Halo Diskriminasaun bá Rekoñesimentu Kazamentu Relijioza

Jornalista: Gloria Maia