Hatutan.com, (22 Novembru 2023), Díli—Iha Kuarta 22 Novembru tinan ne’e, Ministériu Justisa (MJ) liu hosi Diresaun Nasionál Servisu Rejistu Notariadu (DNSRN) hahú hala’o atendimentu bá sidadaun sira ne’ebé trata pasaporte, maibé sidadaun barak forma naruk dudu-malu no monu to’o balun sofre kanek, nune’e parte Ministériu apela atu sira ne’ebé mai hosi munisípiu tenke fila fali bá trata iha idaidak nia munisípiu.

Sidadaun sira forma naruk hodi trata pasaporte iha edifisiu Diresaun Nasionál Servisu Rejistu Notariadu (DNSRN), Díli, Kuarta (22/11/23). Foto: Tome da Silva.

Abitante Adriano da Costa preokupadu ho situasaun ne’e tanba Diresaun Nasionál Servisu Rejistu Notariadu (DNSRN) ne’ebé trata pasaporte ho sistema manuál prezudika sidadaun sira.

Lee Mós: Trata Pasaporte, Kada Loron Atende Ema Na’in 140

Nia triste tanba ema barak mai sedu, barak mak mai forma iha tuku 5:00 madrugada, bainhira funsionáriu sira hahú halo atendimentu iha oras servisu, ema barak hadau-malu no dud-malu to’o balun tenke monu to’o sofre kanek.

“Husu Governu atu halo mudansa bá mekanizmu atendimentu ne’e. Bele halo atendimentu ho sistema online diak liu, nune’e ema bele rejistu online de’it, evita ema dudu-malu no bainhira atu hasai foto mak mai,” Adriano da Costa hateten iha edifisiu DNSRN, Kuarta (22/11/23).

Sidadaun ne’e observa katak, inan feton barak mak sa’e morru no balun monu to’o kanek, ne’e triste boot ida, nune’e husu Governu atu bele buka mekanizmu diak ida hodi hadi’a Sistema atendimentu ne’e.

Kona-bá preokupasaun no situasaun ne’e Diresaun Nasionál Servisu Rejistu Notariadu, João Fernando Borges rekoñese katak, durante fulan ualun nia laran, sidadaun sira hein hela pasaporte, tanba ne’e ho atendimentu ida ohin sidadaun sira mai sedu no forma naruk iha fatin ne’e, maibé funsionáriu sira sei halo atendimentu ne’ebé di’ak iha tempu tuir mai.

“Durante fulan 8 ita laiha passaporte sira hotu hein oportunidade ida-ne’e. Ohin ita loke atendimentu bá públiku, konserteza ema mai barak. Ita sei tenta atu atende sira hotu tuir kapasidade ne’ebé iha. Maibé, la’ós ohin hotu kedan, atu halo satisfasaun ba públiku ne’e lá’ós fásil. Ita tenta nafatin atu fahe nomor bá sira. Ohin 140 uluk, depois aban 140, bainrua 140 nune’e sira ne’ebé iha ne’e ita bele atende hotu,” João Fernando Borges hateten.

Diretór Jerál ne’e mós husu bá sidadaun sira ne’ebé mai hosi munisípiu, di’ak liu fila fali ba idaidak nia munisípiu hodi trata pasaporte iha ne’ebá, tanba funsionáriu sira sei check dokumentus, sei haruka fila.

“Munisípiu hotu-hotu halo atendimentu. Sira ne’ebé mai hosi munisípiu, fila bá ida-idak nia munisípiu. Iha ne’e bá munisípiu Díli de’it no atende pedidu ofisiál sira hosi instituisaun relevante sira. Ita halo ona desentralizasaun servisu bá munisípiu hotu-hotu halai fali mai iha nasionál. Ida-ne’e mak ita nia problema,” nia apela.

Tuir oráriu, funsionáriu sira tama iha tuku 08:00 dedeer, hahú atendimentu iha tuku 08:30.

Jornalista: Tome da Silva