Hatutan.com, (24 Novembru 2023), Díli—Prezidente Parlamentu Nasionál (PPN), Maria Fernanda Lay esklarese katak, atu kombate korrupsaun no garante boa governasaun iha Timor-Leste (TL) la depende de’it bá servisu Komisaun Anti Korrupsaun (KAK) nian.

Maria Fernanda Lay. Foto/dok.PN

Maria Fernanda Lay hato’o esklaresimentu ne’e hanesan resposta ida bá preokupasaun públiku kona-bá servisu investigasaun KAK nian parradu, tanba to’o ohin loron seidauk hili Komissáriu foun ne’ebé implika bá kazu korrupsaun barak mak pendente no la halo investigasaun.

Lee Mós: Tempu Badak, PPN Anunsia Loron Eleisaun Komisáriu CAC

Nia dehan, instituisaun ne’ebé halo kontrollu bá korrupsaun iha Timor-Leste la’ós de’it KAK, maibé iha institutusaun seluk ne’ebé tau-matan mós bá problema korrupsaun tanba KAK dala barak hetan kazu barak no haruka hotu bá Prokuradoria Jerál Repúblika (PJR) maibé la fó segimentu, ida-ne’e mós konsidera hanesan problema ida.

“Ne’ebé Komissáriu KAK laiha, nia impaktu direta laiha tanba investigasaun la’o hela iha parte Polísia Sientífika Investigasaun Kriminál (PSIK) nian, PJR mós halo hela investigasaun,” Maria Fernanda Lay hateten iha Palásiu Prezidensiál Nicolau Lobato Bairru-Pité, Kinta (23/11/2023).

Nia mós informa katak, Governu submete ona naran kandidatu rua bá Parlamentu Nasionál (PN) mak komisáriu KAK sesante Sérgio Hornay no Rui Pereira, maibé bankada FRETILIN rezeita kandidatu Sérgio Hornay no husu atu Governu elimina tiha.

“Eleisaun bá Komissáriu KAK depende ba Governu no Bankada FRETILIN lakohi kandidatu Komisáriu Sérgio Hornay. Ne’ebé ha’u hanoin ne’e normál, tanba uluk mós ami la aseita atu iha kandidatu úniku no tenke iha kandidatu rua,” nia informa.

Kona-bá Komissáriu KAK nian sei iha prossesu negosiasaun, no Prezidente PN ne’e hein katak Governu mós sei fó atensaun bá assuntu ne’e depois de OJE 2024.

Jornalista: Vito Salvadór