Hatutan.com, (25 Novembru 2023), Díli—Parlamentu Nasionál (PN) liu hosi Prezidente Komisaun A ne’ebé trata assuntu Lejizlasaun no Justisa, deputadu Patrocinio Fernandes husu bá públiku katak, tanba saida mak la kestiona órgaun soberanu sira seluk ne’ebé uza karreta ho folin karun-liu aumenta tán ho karreta seguransa nian iha oin no mós iha kotuk.
![](https://www.hatutan.com/wp-content/uploads/2023/11/Patrocino-Fernades-Deputadu-CNRT-281x300.jpeg)
Prezidente Komisaun A ne’ebé trata asuntu Lejizlasaun no Justisa, deputadu Patrocinio Fernandes. Foto: Zita Menezes.
Patrocinio husu ne’e relasiona ho assuntu subsídiu transporte $1.600 no subsídiu saúde $600 bá deputadu sira ne’ebé oras-ne’e daudaun sai preokupasaun públiku nian.
Lee Mós: Ramos-Horta Kontra Alterasaun Estatutu Deputadu Ne’ebé Fó Benefísiu Ezazeradu bá Elite Polítiku Sira
“Órgaun soberanu sira iha Timor-Leste ne’e deputadu sira de’it. Nusa mak imi la kestiona took juíz sira sa’e karreta ho folin boot liu, uza tán karreta eskoltu nian hosi oin kotuk ne’e inimigu ne’ebé mak iha Timor ne’e. Objetivu maka karreta ne’e atu fasilita de’it servisu. Órgaun sira seluk uza karreta rua tolu laiha problema, só deputadu sira mak labele uza karreta karik,” Deputadu Patrocinio Fernandes hateten iha PN, Sesta (24/11/23).
Prezidente Komisaun A haktuir katak, subsídiu kona-bá transporte no saúde bá deputadu sira, antes ne’e iha tiha ona no Lei ne’e altera la’ós foin mak atu ko’alia kona-bá subsídiu ne’e.
“Tinan barak bá kotuk ne’e deputadu sira uza tiha ona karreta deputadu nian, no subsídiu bá saúde ne’e ha’u rasik seidauk sai deputadu, sira uluk ne’e simu tiha ona,” nia hateten.
Nia esplika, buat ne’ebé sai konfuzaun ne’e tanba iha Kinta Lejislatura antes ne’e altera tiha Lei estatutu ne’e atu selu subsídiu saúde kada fulan nian no subsídiu saúde ne’e nia objetivu atu halo manutensaun saúde bá deputadu sira nian.
“Hanesan ne’e, la’ós deputadu sira de’it mak hetan maibé Prezidente Repúblika, Membru Governu sira, Tribunál no Juíz sira hotu-hotu hetan buat ida subsídiu saúde nian,” Patrocinio Fernandes esklarese.
Kona-bá subsídiu transporte bá deputadu sira kada fulan $1.600 ne’ebé agora daudaun sei iha prosesu laran ne’e, nia dehan, ne’e atu fó bá deputadu sira hodi buka rasik transporte privadu atu uza bá servisu loro-loron nian.
“Mekanizmu bá karreta tanba públiku dehan katak, Parlamentu Nasionál labele sosa karreta, entaun atu muda de’it sosa karreta ne’e fó fali subsídiu bá deputadu sira hodi buka meiu oinsa mai servisu. Ida-ne’e de’it mak objetivu hosi alterasaun Lei ne’e. Maibé, ami iha hela prosesu dezde ké seluk la aseita lei ne’e em vigór no durante ne’e ha’u mós seidauk hetan deklarasaun hosi deputadu sira dehan sira nia subsídiu ne’e atu entrega fali bá Estadu,” nia tenik.
Deputadu ne’e mós observa katak, kondisaun karreta sira iha Parlamentu Nasionál barak mak la di’ak ona liuliu karreta prado no pajero ne’ebé dalabarak deputadu balun hato’o fali pedidu hodi husu karreta operasionál sira hodi bá halo fiskalizasaun.
Fernanda Lay Vota Kontra
Prezidente Parlamentu Nasionál (PPN) Maria Fernanda Lay vota kontra projetu Lei Nu 4/VI/(1.a), terseira alterasaun númeru 5/2004, 5 de Maio estatuto dos deputados iha Parlamentu Nasionál, Loron 22/11/23, hafoin halo diskusaun no votasaun jenerelidade ho aprovasaun 50, abtensaun 6 no kontra 1.
“Votasaun ne’e responsabilidade kada pessoál nian ne’ebé iha orientasaun kada bankada bele bá assuntu ne’ebé ha’u tenke tuir. Maibé iha buat balun ha’u nia konsiénsia akuza duni. Ha’u haree konfuzaun ida-ne’e eu naõ quero entra na problema tamben. Tanba ha’u nia votasaun, ha’u la’ós fase-liman maibé dalabarak dudu assuntu Prezidente bá assume responsabilidade la’e,” Fernanda Lay hateten iha Plenária, Kuarta (22/11/23).
Jornalista Estajiária: Zita Menezes