Hatutan.com, (04 Dezembru 2023), Lautem—Programa Integradu Saúde hosi Ministériu Saúde (MS) ne’eb’e ho nia konteúdu atu halo akvokasia no lori informasaun kle’an bá komunidade iha baze hodi prevene moras da’et, la hada’et, tuberkoluze, dengue no mos moras sira seluk, to’o ona munisípiu Lautém.

Reprezentante Gabinete Kuidadu Saúde Primária, Médiku, Sérgio da Costa Belo. Foto: Lazaro Pereira Quefi.

Reprezentante Gabinete Kuidadu Saúde Primária, Médiku, Sérgio da Costa Belo esplika, Ministériu Saúde inisia hodi hamosu programa ne’e tanba haree bá moras dengue no mós Tuberkoluze agora sai hanesan problema boot iha Timor Leste.

Lee Mós: MS Kontinua Implementa Servisu Integradu Saúde Iha Baucau

“Tuberkoluze númeru agora aas iha Timor Leste. Tanba ne’e mak tenki habelar informasaun ba iha komunidade nune’e sira bele kompriende didiak hodi halo prevensaun,” Sérgio da Costa Belo hateten iha Sentru Saúde Lospalos-Vila, Segunda (04/12/2023).

Programa ne’e hanesan programa advokasia ne’ebé abertura iha Dili, no loron sira tuir mai espanda bá iha territóriu Timor Leste mai to’o iha Munisípiu Baucau no agora kontinua mai iha Lospalos.

Advokasia ne’e sempre halo maibé bá progarama integradu ne’e Ministériu Saúde foin mak halo fila-fali atu nune’e parte relevante sira servisu hamutuk hodi lori informasaun ne’e to’o iha komunidade iha baze.

Durante ne’e dalaruma Ministeriu idak-idak la’o ninian hanesan Polísia Nasionál Timor Leste (PNTL), Ministériu Saúde, no sira seluk tán la’o ketak entaun komunidade labele persebe informasaun sira ne’e ho di’ak.

Tuir planu, advokasia ne’e sei remata loron 20 Dezembru tinan ne’e iha nível nasionál, maibé sei la kobre hotu entun ida-ne’e sei iha kontinuasaun nune’e informasaun ne’e labele paradu.

Diretor Servisu Saúde Lautém, Anastasio da Cruz. Foto: Lazaro Pereira Quefi.

Iha fatin hanesan diretor Servisu Saúde Lautém, Anastasio da Cruz dehan, kampaña integradu promosaun saúde bá moras dengue, TBC, mal-nutrisaun, asidente no moras da’et ho la hada’et ne’e foin hahú realiza iha Munisipiu Lautém iha sentru Saude Lospalos.

Nune’e, advokasia bá nivel postu administrativu ne’e bolu autoridade lokál sira hanesan Xefe suku, Xefe Aldeia no komunidade sira atu bele implement iha terrenu.

Kona-bá mobilizasaun komunidade ne’e kompeténsia hosi Xefe suku ninian no aldeia sira, no tuir planu sei hala’o iha tempu kalan no loron.

“Autoridade lokál sira mak mobiliza komunidade hotu atu mai partisipa, hodi bele rona informasaun ida kle’an atu sira bele prevene an iha idak-idak nia hela fatin,” Anastasio da Cruz hateten.

Diretor ne’e haktuir, agora daudaun tama ona bá tempu udan no sei lori moras oioin tanba ne’e mak presiza fó informasaun bá komunidade atu iha preparasaun másima bá prevensaun moras dengue no mos ba moras sira seluk.

Xefe Aldeia Solepara, Tomas Monteiro. Foto: Lazaro Pereira Quefi.

Iha fatin hanesan, xefe aldeia Solepara, Suku Kakavei, Postu Administrativu Lospalos, Tomas Monteiro orgullu ho programa ne’e tanba pessoál saúde sira rasik tun direta to’o iha baze atu fahe informasaun oinsa komunidade prevene an hosi moras saida de’it.

“Ha’u sei ba fó hatene ha’u nia komudade hotu-hotu atu pessoal saúde sira tun to’o baze karik tenke bá rona diretamente nune’e sira bele hatene kle’an liu kona-bá prevensaun ne’e rasik,” Tomas Monteiro promete.

Programa integradu ne’e kompostu hosi PNTL, Ministériu Saúde, Ministériu Administrasaun Estatál  no seluk tán.

Jornalista Estajiáriu:  Lazaro Pereira Quefi