Hatutan.com (06 Outubru 2023), Lospalos-Turista sira; lokál no estranjeiru, preokupa tebes kona-bá rede telekomunikasaun ho asesu bee-moos ne’ebé difisil tebetebes iha fatin turizmu Illa Jaco, Postu Administrativu Tutuala, Munisípiu Lautem.

Lee Mós: Rusa Sira iha Illa Jaco Balun Mate Daudaun Tanba Menus Ai-han

Otél no Restaurante Lakumore iha Valu, Postu Administrativu Tutuala, Munisípiu Lautem. Foto/Elio dos Santos da Costa

La’ós turista sira de’it, maibé abitante sira ne’ebé negósiu hanesan loke restaurante no otél iha Valu, Postu Administrativu Tutuala, mós tinan bai-loron preokupa ho rede telekomunikasaun, inklui rede internet ho bee-moos ne’ebé sai difikuldade boot.  

Na’in bá Otél no Restaurante Lakumore, Ipolito de Jesus bá Hatutan.com iha Valu, Kinta (05/10/2023), haktuir durante ne’e vizitante ka turista sira barak hosi rai-li’ur no rai-laran, tama-sai vizita Illa Jaco. Sira tau kestaun boot liu mak rede telekomunikasaun ho fasilidade bee-moos ne’ebé mínimu tebetebes.

“Iha ne’e so rede telekomunikasaun Timor Telecom (TT) de’it mak di’ak, maibé Telkomcel ho Telemor laiha asesu. Rede telekomunikasaun TT ne’e di’ak uitoan ne’e iha de’it tuku 09.00-tuku 10.00 dadeer no iha parte meiudia ho loro-kraik ne’e susar tebetebes,” Ipolito de Jesus haktuir.

Turista sira maioria haksolok vizita Illa Jaco, maibé sira la aguenta hela liu loron-rua, tanba bee-moos laiha, rede telekomunikasaun la di’ak. Nune’e, turista sira-ne’e másimu liu hela iha Valu atu bá Jaco kalan ida no loron ida de’it.

Na’in bá Otél no Restaurante Lakumore, Ipolito de Jesus ho nia espoza, Alvina da Costa da Silva. Foto/Elio dos Santos da Costa

Relasuona ho bee-moos iha  tempu udan monu rai sira akpata husi udan-been, maibé agora daudaun tempu bailoron  restaurante no otél na’in sira iha Valu tenke kuru rasik ho sira-nia karreta hosi Aldeia Petileti Antigu lori mai Valu ho distánsia kilómetru ualu (8km).

Hipolito ho abitante sira iha Valu kalaniza beibeik ona informasaun sira kona-bá turista sira-nia lamentasaun bá fasilidade bee-moos ho rede telekomunikasaun ne’e bá Governu, maibé to’o agora seidauk iha resposta pozitivu hodi buka solusaun bá difikuldade ne’e.

“Foin lalais Sekretáriu Estadu Guarda Floresta  ho Sekretária Estadu Bee no Eletrisidade mai haree ona ho ha’u rasik hamutuk ho sira haree fatin tolu hanesan ne’e depois sira halo planu oinsá atu bele kanaliza bee-moos mai iha fatin ida ne’e para ema  sira ne’ebé mai vizita ne’e bele uza,” Hipolito de Jesus informa.

Otél no restaurante Lakumore  hahú  konstrui iha tinan 2004  no konsege finaliza iha tinan 2009 no inagura husi Primeiru-Ministru atuál Xanana Kay Rala Gusmão iha momentu ne’ebá.

Otél Lakumere prepara fasilidade bá turista sira atu deskansa. Presu bá kada kuartu otél nian variable. Kuartu ho presu $20.00 bá kalan ida konsidera kuartu normal, iha kuartu balun ho presu $40.00-$50.00 bá kalan ida nian ne’ebé fasilidade di’ak no prepara mós kuartu bá VIP sira ho presu $100.00 bá kalan ida.

Jornalista Estajiária: Zita Menezes