Hatutan.com (12 Novembru 2023), Dilí—Ministru Justisa, Amândio de Sá Benevides to’o ohin loron seidauk simu relatóriu kona-bá kargu xefia balun iha Policia Científica e de Investigação Criminal (PCIC) ne’ebé deskonfia komete irregularidade no abuzu podér fó pistola ba oan hodi tiru halimar iha áera Kaitehu, suku Tibar.

Ministru Justisa, Amândio de Sá Benevides. Foto: Elio dos Santos da Costa.

“Ami halo investigasaun, maibé la mosu irregularidade. Buat hotu di’ak hela. Ami halo ona averiguasaun interna nó laiha buat ida. Ha’u seidauk hetan relatóriu fó pistola bá nia oan hodi treinu,” Amândio de Sá Benevides hateten hafoin partisipa iha diskusaun OJE iha Parlamentu Nasionál (PN), Tersa (12/12/2023).

Lee Mós: Deskonfia, Superiór Sira iha PCIC Komete Irregularidade no Abuzu Podér

Amandio rasik lá hatene, maibé bainhira ida-ne’e akontese duni, Governu presiza hadi’a bá oin atu haree took kondisaun ne’e, nune’e labele akontese. Kona-bá evidénsia sira, nia dehan, PCIC iha rasik inspesaun interna oinsá haree atu halo servisu.

Maski nune’e, Ministru ne’e la fiar hó informasaun sira ne’ebé mak Jornalista sira hato’o ba nia, tanba konsidera anónimu de’it, ne’ebé laíha asinatura ka karta ofisiál ruma hodi halo investigasaun.

“Ha’u labele fiar buat ida ne’ebé Jornalista sira mak fó hatene. Kona-bá evidénsia vídeo ne’e, ha’u mós bele halo evidénsia video. Ita tenke mai ho evidénsia ne’ebé akuradu atu bele prova ikus mai bele halo investigasaun tuir lei. Agora ita rona ema fo karta anónima, ne’e labele fiar. Se ema ida mai hakerek naruk fó ba média, hakerek ba instituisaun sira hotu maibé la asina, ne’e simplesmente barailla de’it, maibé situasaun normál hela,” nia haktuir.

Daudaun ne’e Governu liu hosi Misitériu Justisa halo hela esforsu makaas iha ne’ebé  foin lalais Ministru ba Portugál hafoin fila mai sei buka meius oinsá bele eleva PCIC nia formasaum no PCIC atu reforma ne’e mak iha loron 06 fulan ne’e, membru balun arranka ona bá Portugál hodi tuir formasaun atu nune’e, reforma entermus kualifikasaun atu sira bele halo servisu investigasaun kriminál di’ak liu tán.

Jornalista: Gloria Maia