Hatutan.com, (12 Dezembru 2023), Díli—Deskonfia Arguida MCS nu’udar na’in bá sósiu empreza DILI ETERNAL INNOVATION INFORMATION, Lda, sees ona hosi territóriu nasionál Timor-Leste.

Lee Mós: PGR Kontinua “Taka-Ibun” bá Kazu Set-top Box RTTL, E.P

CAC halo buska no aprrensaun bá arguidu ida no arguida MCS relasiona ho kazu projetu instalasaun Set-Top Box RTTL,E.P, loron 12 fulan-Outubru 2022. Foto/Dok.Hatutan.com

Informasaun ne’ebé Hatutan.com rekolla hosi fontes oioin katak arguida MCS daudaun ne’e haksumik aan iha Bali-Indonézia hafoin liu tiha fulan balun Komisaun Anti Korrupsaun (CAC) halo buska no apreensaun  iha loron  12 fulan-Outubru 2022, relasiona ho kazu projetu instalasaun Set-top Box (STB) Rádiu Televizaun Timor-Leste, Empreza Públiku (RTTL,E.P).

Tempu ne’ebá CAC  liuhosi ekipa Medida Prevensaun no Kombate Korrupsaun halo buska no apreensaun inklui tau alzema (borgol) bá arguida MCS tanba deskonfia envolve iha projetu instalasaun Set-top Box RTTL,E.P ne’ebé lori prejuízu bá Estadu ho montante orsamentu $7,680.00.

Relasiona ho informasaun ne’e, Hatutan.com, Segunda (11/12/2023), halo konfirmasaun ho arguida nia advogadu privadu Arlindo Dias Chances. Nia dehan, depois Komisaun Anti Korupsaun (CAC) ho Ministeriu Publiku (MP) halo buska no apreensaun bá argidu ho arguida sira ne’ebe deskonfia envolve iha kazu projetu instalasaun  Set-top-Box  nia parte sei halo akompañamentu no iha kontaktu to’o ba iha primeiru Interogatoriu (PI)  ihaTribunál Judisial Primaria Instansia Dili (TJPID), to’o  husu hotu sasan sira ne’ebe  MP halo apreensaun.

“Depois  ida-ne’e laiha ona kontaktu. Tuir ha’u nia hatene, arguida servisu iha FFTL, maibé  dadauk  ne’e nia iha Timor ka iha rai-li’ur ne’e ha’u la hatene, ha’u laiha informasaun kona-ba ida-ne’e,” Arlindo Dias Chances haktuir.

Arlindo Dias Chances dehan, nia parte  kaer argiuda nia kazu to’o ba Primeiru Interogatoriu, nune’e iha desijaun Tribunál nian aplika Aprezentasaun Periodika (AP) bá arguidu  eis Ministru MAPKOMS Francisco Martinns da Costa Pereira Jeronimo, no bá Arguida MCS prende hotu nia pasaporte atu labele sai hosi territóriu Timor-Leste, signifika argida tenke iha Timor deit labele ba rai-li’ur.

Advogadu Arlindo Dias Chances sei akompaña argiuda foti sasán sira hanesan, karreta, telefone, husik de’it pasaporte, maibe depois ida ne’e hotu ona, laiha tan ona kontaktu.

“Ha’u laiha kontaktu ho nia, ha’u la hatene nia paradeiru agora dadauk ne’e, tanba depois Primeiru Interogatóriu hotu, kontinuasaun ne’e fila-fali bá iha kompetensia tomak iha Ministeriu Públiku hodi kontinua halo investigasaun ka taka ka no toma atensaun bá argidu  sira ho arguida,” Arlindo hateten.

Nia esplika, tuir lei ne’ebe iha, bainhira investigasaun ne’e hala’o durante fulan neen (6), aumenta tan fulan neen (6), se durante tinan-ida  maka prosesu seidauk bá rejistu iha MP, maka tenke liberta argidu sira, tanba tempu halo akuzasaun nian hotu ona. Ho ida-ne’e maka, se arguida la’o sai hosi Timor bá nasaun seluk, ne’e responsabilidade MP nian. 

Dezde Marsu 2023 La Servisu iha FFTL

CAC halo buska no apreensaun bá dokumentu iha gabinete Ministru Assuntu Parlamentár no Komunikasaun Sosiál (MAPKOMS), Francisco Pereira da Costa Jerónimo, hodi hakle’an investigasaun ba kazu instalasaun Set-top Box RTTL,E.P, Segunda (17/10/2022). Foto/dok. Hatutan.com

Informasaun seluk ne’ebé Hatutan.com rekolla hosi fontes sira ne’ebé husu atu la bele publika nia identidade hateten, dezde kedas fulan-Marsu 2023, arguida MCS ne’ebé servisu hanesan Sekretaria Gabinete Prezidente FFTL la servisu ona iha FFTL tanba nia aprezenta nia karta rejignasaun bá ezekutivu FFTL.

Fontes ne’e hateten, hafoin akontesimentu buska no apreensaun ne’ebé CAC halo bá arguida MCS tempu ne’ebá nia mós deside hases aan kedas hosi FFTL.

“Ha’u lembra hela katak iha fulan-Marsu 2023 nia rejigna aan no hatama nia karta ba iha ezekutivu FFTL,”  fontes ne’e haktuir, Segunda (11/12/2023).

Iha Sesta, 30 fulan-Dezembru 2022 Arguida MCS akompaña hosi nia defeza ka  hakat bá Tribunál Distritál Díli (TDD) hasoru malu ho Juiz Administradór Afonso Carmona.

Prezensa  arguida MCS ho nia Defeza hasoru malu ho Juiz Administradór Afonso Carmona, tempu ne’ebá, atu husu TDD nia autorizasaun hodi halo pedidu bá Ministériu Públika (MP)   haree fila-fali evidénsia balun ne’ebé mak Komisaun Anti Korrupsaun (CAC, sigla portugés) halo ona apreensaun.

Na’in bá sósiu empreza DILI ETERNAL INNOVATION INFORMATION, Lda bá projetu instalasaun Set-top Box Rádiu Televizaun Timor Leste, Empreza Públiku (RTTL,E.P) konsidera katak evidénsia sira ka sasán  balu ne’ebé CAC halo apreensaun la’ós  evidensia krime. Tanba ne’e, arguida MCS ho nia defeza husu Tribuál nia despaixu atu foti fila -fali evidénsia hirak ne’ebé la inklui iha krime.

Tribunál haruka fila arguida MCS bá Ministériu Públika  tanba faktu no evidénsia hotu iha Ministeriu Públiku tanba prosesu kazu ne’e dadaun ne’e iha hela investigasaun laran.

Iha loron 12 fulan-Outubru 2022, CAC  liuhosi ekipa Medida Prevensaun no Kombate Korrupsaun, halo buska no apreensaun inklui tau alzema (borgol) bá arguida MCS nu’udár na’in ka sósiu empreza DILI ETERNAL INNOVATION INFORMATION, Lda, tanba deskonfia envolve iha projetu instalasaun Set-top Box RTTL,E.P ne’ebé lori prejuízu bá Estadu.

Iha parte dadeer, CAC destaka kedan nia investigadór sira hodi bá buka-tuir arguida MCS iha nia rezidénsia iha área Matadouro, Suku Vila Verde , Díli, hale’u tuku 10:00 Otl, maibé na’in bá empreza DILI ETERNAL INNOVATION INFORMATION ne’e iha hela servisu fatin Federasaun Futeból Timor-Leste (FFTL),  Bairro dos Grilhos, Díli.

Ekipa CAC diretamente tau alzema ka borgol arguida MCS, inklui  rekolla no halo apreensaun bá dokumentu sira ne’ebé iha,  inklui veíkulu ida ho marka Pajero Fortuner ho xapa matríkula A.28.832.

Remata hosi FFTL, ekipa CAC nian kontinua transporta arguida MCS  bá edifísiu sentrál CAC nian hodi kumpre detensaun durante oras 72 nia laran.

Iha loron 15 fulan-Outubru 2022, Tribunál Distritál Díli (TDD),  hala’o prosessu primeiru interrogatóriu bá arguidu GDS ho arguida MCS ne’ebé deskonfia involve iha Kazu Instalasaun Set-Top Box Rádiu Televizaun Timor Leste Empreza Públika (RTTL,E.P).

Tempu ne’ebá arguidu ho  arguida to’o iha Tribunál Distritál Díli iha tuku 9:00 dadeer ne’ebé hetan akompañamentu hosi investigadór sira Comissão Anti Corupção (CAC) ho borgól ka alzema iha liman.

Iha prosesu primeiru interrogatóriu ne’e, Ministériu Públiku (MP) liu hosi Prokuradór Matias Soares imputa krime Abuzu Podér, Brankeamentu Kapitál, Fraúde Fiskál, Partisipasaun  Ekonomia iha Negósiu no Konflitu bá Interese bá arguidu sira ho arguida ne’e relasiona ho projetu instalasaun Set-top Box RTTL,E.P.

Jornalista: Gloria Maia/ Vito Salvadór