Hatutan.com, (22 Dezembru 2023), Díli-Polícia Ciêntífica e de Investigação Criminál (PCIC),  Sesta (22/12/2023), asegura ona Bruno Magalhães hodi halo identifikasaun tanba deskonfia komete krime burla ka bosok hodi halo kobransa bá komunidade sira.

PCIC halo detensaun bá sidadaun ida ho identidade Bruno Magalhães tanba deskunfia komete krime burla ka sobok. Foto/Elio dos Santos da Costa

Autoridade PCIC sira hola medida ne’e relasiona mós ho video ne’ebé espalla iha rede sosiál Facebook, hatudu momoos sidadaun ida ne’ebé ho identidade Bruno do Rosario Magalhães halo esklaresimentu hela bá abitante balun kona-bá maneira atu hetan osan fasil, atu hanesan milagre, tanba  ho de’it kartaun billete identidade ka pasaporte hodi hetan osan fasil no lalais liu. Maibé, ema ne’ebé atu asesu bá osan kada loron $55.00 tenke hatama uluk $55.00 bá nia.

Iha artigu 53 hosi Lei Kódigu Prosesu Penál (CCP-sigla portugés) fó kompeténsia bá Polísia atu halo prosesu identifikasaun bá sidadaun pesoal sira ne’ebé deskofia komete kríme.

Bainhira Hatutan.com halo konfirmasaun asuntu ne’e ho portavós no Xefe Investigadór PCIC nian, Octavio de Araújo, maibé nia parte informa katak, superiór sira PCIC la autoriza la autoriza atu koalia bá mídia.

“Atu informa de’it bá kolega jornalista sira karak, pur-ordém superiór, relasiona ho identifikasaun bá Sr. Bruno Magalhães, lá autoriza atu fó komentériu,” Octavio de Araújo haktuir iha mensajen WhatsApp bá Hatutan.com.

Tuir lei, investigadór sira PCIC nian, sei halo identifikasaun bá sidadaun ne’e durante oras 12, sura hosi oras detensaun, hosi tuku 10:00 dadeer to’o 22:00  Otl. Hafoin identifikasaun, investigadór sira sei haruka Bruno Magalhãese fila bá uma, maibé, kona-bá autus ka evidénsia sira, PCIC sei enkamiña hotu bá Ministériu Públiku (MP), hanesan na’in bá asaun penál.

Informasaun hosi autoridade polisial sira katak, molok ne’e Bruno Magalhães hetan uluk ona mós detensaun  hosi autoridade autoridade Repúblika Indonézia iha tinan hirak liubá no hetan pena prizaun tinan ida, fulan-rua, ho nia maluk na’in-tolu seluk, tanba sira envolve iha produsaun bá osan falsu.

Jornalista: Rogério Pereira Cárceres