Hatutan.com, (31 Janeiru 2024), RAEOA— Prezidente Autoridade Rejiaun Admistrativa Espesiál Oecusse Ambeno (RAEOA), Rogério de Fátima Tiago Lobato iha programa prioridade hitu (7) atu implementa durante mandatu.

Primeiru Ministru (PM), Kay Rala Xanana Gusmão fó posse bá Prezidente Autoridade Rejiaun Admistrativa Espesiál Oecusse Ambeno (RAEOA), Rogério de Fátima Tiago Lobato iha Otél Oe-Upun, Palaban, Kuarta (31/01/2024). Foto: Média SEKOP.

Rogério fó-sai programa prioridade hitu ne’e liu hosi diskursu serimónia posse ne’ebé hala’o iha Otél Oe-Upun, Palaban, Kuarta (31/01/2024).

Lee Mós: Rogério Lobato Sei Tane Interese Povu Atoni no Investiga Ró Haksolok

Prezidente Autoridade RAEOA ne’e konsidera mandatu tinan lima ne’e la’o ho lais liu, tanba ne’e programa prioridade sira ne’e presiza define ho klaru mak hanesan:

1. Fornesimentu bee-moos bá populasaun RAEOA,
2. Hamenus presu eletrisidade hosi 0,23 cent ba 0,10 cent hodi fasilita investimentu ne’ebé kria industrializasaun ba rejiaun,
3. Fó direitu titulu bá rai hodi fasilita assesu ba povu hodi hetan kréditu hosi banku,
4. Konstrusaun ne’ebé lais ba estrada,
5. Regularizasaun ne’ebé justu ba kompensasaun bá rai no propriedade privadu ne’ebé ho abuzu podér hosi autoridade sesante ba rai no propriedade privadu,
6. Reforsa kontinua fó apoiu ba seitór edukasaun, saúde públika, pekuária no peskas.
7. Seitór turizmu no indústria ospitalidade sei sai hanesan alvu importante ne’ebé rejiaun sei haktuir.

“Ha’u assume hohakraik an, konsiente ho dezafiu ne’ebé boot tebes mai ha’u. Maibé, ne’e hanesan responsabilidade boot ida ne’ebé difísil atu resolve, maibé ha’u prontu serbí di’ak ita nia rain liu- liu rai ketan kiik oan ida ne’e,” Rogério hateten.

Nia agradese bá povu tomak, hahú hosi Oe-cusse Ambeno to’o Jaco, bá knar ne’ebé nia simu hosi Primeiru Ministru, Kay Rala Xanana Gusmão nu’udár Prezidente Autoridade bá RAEOA.

“Ha’u deklara aseita bá konfiansa ne’ebé mak boot tebes hodi dezenvolve Oe-cusse Ambeno. Ha’u sei sai hanesan servidór ne’ebé mak leal no la hatene kolen bá Oe-cusse Ambeno ho nia emar sira,” nia deklara.

Hanesan Prezidente Autoridade RAEOA, Rogério promete sei hala’o servisu no kontinua permanente koordena ho Primeiru-Ministru, atu lori duni dezenvolvimentu ne’ebé lalais no aseleradu iha territóriu RAEOA.

Nia sita katak, Rejiaun Administrativa Oe-cusse Ambeno iha estensaun 815 km2 ho nia popualsaun 71.000 abitantes, jeografikamente ninia pozisaun ne’e favorável hodi atrai investimentu hosi rai saliva.

Maski medida ne’ebé kiik ho territoriál ne’ebé ho rikun soin mak barak, nune’e Rogério hateten, iha importánsia ekonómika oioin, tenki dezenvolve duni rekursu naturais sira ne’e hodi benefísia abitante hotu-hotu iha rejiaun ne’e.

Liu hosi programa ZEESM, nia dehan, presiza elabora no implementa ho di’ak, sei bele sustenta an rasik ho fundus próprio ida, la presiza ona hasai osan hosi kofre estadu, no transforma fonte ne’ebé importante tebes no inkluzivu, nomós fó kontribuisaun bá Orsamentu Jerál Estadu.

Prezidente Autoridade RAEOA mós promote katak, nia sei fó apoiu tomak bá João Mendes Gonçalves ne’ebé nomeadu hosi Konsellu Ministru hanesan koordenadór bá Komisaun Ezekutiva ZEESM.

Prezidente Autoridade RAEOA mós apela bá nia sekretaria rejionál sira  atu serve ho dedikasaun no espíritu bá misaun Rejiaun ne’e nian.

“Imi hotu mesak Oe-cusse oan, imi servi imi nia povu tomak ho fuan ho laran,” nia apela.

Nia mós agradese no apresia bá servisu ne’ebé Prezidente autoridade sesante, Arsénio Paixão Bano halo ona durante mandatu.

Iha fatin hanesan, Primeiru Ministru (PM), Kay Rala Xanana Gusmão husu emposadu sira tenki servisu maka’as hodi dudu dezenvolvimentu iha RAEOA.

Xanana dehan, povu hili IX Governu Konstitusionál tanba atu halo mudansa bá naksalak sira ne’ebé durante ne’e Governu anteriór sira komete.

“Ha’u husu ba emposadu sira atu tau-matan bá atoni oan sira nia moris no dezenvolve Oecuse ba oin,” Xanana husu.

Xefe Governu husu atu labele egoista no labele taka an, simu ema hotu nia hanoin hodi hadi’a dezenvolvimentu Oecuse nian ba oin, liu-liu dada bee-moos, hadi’a estrada no ahi bá komunidade.

Estudante Oecusse-oan Husu Hadi’a Estrada bá Área Rurál

Estudante Oecusseoan ne’eb’e hala’o estudu iha Díli, husu Prezidente Autoridade Rogério Lobato atu hadi’a estrada protokolu hosi Oecusse vila bá sub Rejiaun Oesilo, Sub Rejiaun Pasabe, sub Rejiaun Nitibe to’o área rurál.

“Realidade ne’ebé ita haree durante ne’e dezenvolvimentu ne’e la’o iha vila de’it. Maibé, iha foho sei halerik nafatin tanba estrada aat loos,” Meliano Sa’apan hateten iha Kampus UNPAZ, Díli.

Nia husu ne’e tanba maioria populasaun hela iha área rurál ne’ebé moris ho fa’an  sira nia produtu lokál atu bele fasilita oan sira nia eskola.

Nune’e mós estudante ICS, Bendito Poto Caunan dehan, estrutura foun RAEOA ne’e lidera hosi líder 1975 nian maka Rogério Lobato, fiar katak sei tane aas dignidade povu atoni.

“Maski nia ema mai hosi Partidu Fretilin maibé Primeiru Ministru tau fiar atu lidera RAEOA. Ha’u fiar katak, Primeiru Ministru nomeia la haree bá koor partidu tanba Rogério Lobato mós sei dezenvolve Oecusse la haree bá partidu,” estudante ne’e espera. 

Jornalista: Leopoldina de Carvalho/Quefi