Hatutan.com, (05 Fevereiru 2024), Díli—Deputadu José da Cruz hosi bankada FRETILIN levanta dala tolu ona kona-bá situasaun ponte Nunura iha área Maliana nian ne’ebé ameasadu besik atu kotu, atu Governu bele tau iha programa prioridade ka emerjénsia nune’e labele prezudika movimentu komunidade.

Ponte Nunura. Foto Pajina Facebook Marobotv.

“Ha’u hakarak repete bebeik kona-bá infra-estrutura liuliu ponte Nunura ameasadu tebes. Vise-Ministru ha’u hanoin foti hela nota ruma bá katak ponte Nunura iha situasaun ameasadu hela. Ha’u foti ida-ne’e dala tolu ona,” deputadu José da Cruz hateten iha intervensaun plenária, Segunda (05/02/2024).

Lee Mós: Infraestrutura Bázika Sai Prioridade CNRT Iha Bobonaro

Nia hatutan, la’ós ponte Nunura de’it maibé mós iha pontu balun ne’ebé mak iha área Leolima nian, hanesan estrada atu kotu no viral iha média sosiál.

“Ha’u hanoin presiza intervensaun urjente tanba iha situasaun rai udan hela nune’e ita bele halo normalisazaun,” nia sujere.

Iha fatin hanesan, Vise-Ministru Asuntu Parlamentár, Adérito da Costa Hugo hateten, IX Governu Konstitusionál sei halo esforsu bá infra-estrutura ne’ebé ho karákter emerjénsia hodi garante kondisaun estrada sira bá longu prazu.

“Estrada sira ne’ebé emerjénsia IX Governu halo iha Outubru no Novembru, mais emerjénsia ho valór millaun $5 nafatin tenki bá iha Kamara Kontas ho lista préviu. Tanba estrada sira ne’e dalabarak Ministériu Obras Públiku halo ona rehabilitasaun maibé sempre monu no presiza tékniku ho kualidade di’ak hodi garante estrada bá longu prazu,” Adérito da Costa Hugo hateten.

Jornalista Estajiária: Zita Menezes