Hatutan.com, (05 Fevereiru 2024), Díli—Parlamentu Nasionál (PN) liohosi deputadu Luis Roberto hosi bankada KHUNTO hato’o lamentasaun no husu bá Governu atu fó justifikasaun kona-bá razaun Ministériu Komérsiu Indústria (MKI) la estende kontratu funsionáriu SERVE I.P na’in-166.

“Sira ne’ebé mak servisu iha administrasaun SERVE I.P nian, ita hatene katak pessoál ne’ebé mak servisu iha órgaun autonoma hanesan funsionáriu permanente ne’ebé regula iha rejime jerál maibé iha fulan outubru 2023 Ministru Komérsiu Indústria (MKI) fó orientasaun atu hapara kontratu iha 31 dezembru maibé laiha razaun ruma,” Luis Roberto hateten iha plenária PN, Segunda (05/02/24).

Lee Mós: Lalika Politiza Funsionáriu Kontratadu Sira

Nia dehan, diretór sira iha instituisaun autónoma sira ezekuta de’it órden hodi hapara ema na’in 166 maibé la tuir baze legál tanba sira nia kontratu to’o tinan 2027.

Deputadu Luis Roberto mós haktuir, uluk pesoál sira ne’e konkorre iha vaga no ikus mai passa iha vaga sira ne’e depois mak sira hala’o sira nia knaar iha fatin atuál.

“Tanba saida mak ministériu bele hapara sira nian kontratu ne’e. Tuir loloos kontratu ne’e to’o tinan 2027 ne’ebé Vise-Ministru bele responde mós ida-ne’e,’ nia hateten.

Iha fatin hanesan Vise-Ministru Asuntu Parlamentár, Adérito da Costa Hugo haktuir Ministériu relevante hapara kontratadu hirak ne’e bazeia bá kontratu anuál no avaliasaun servisu nian.

Alende ne’e, nia dehan, Governu hapara kontratu funsionáriu kontratadu no kazuais sira tanba kontratu anuál to’o de’it loron 31 dezembru 2023.

“Por eskrita ka la eskrita tanba kontratu termina iha 31 dezembru. Vise-Ministru Koordenadór Asuntu Ekonómiku hasai karta para antes loron 15 konsideramente husu para hapara tanba ministériu halo avaliasaun katak loos, servisu ne’ebé iha atu nesesita renova kontratu bá balun de’it no la’ós hotu-hotu kontinua servisu tanba espasu no servisu iha atu halo duni 120 dias halo asesment bá buat sira ne’e hotu inklui saúde no edukasaun,” Adérito da Costa Hugo hateten.

Jornalista Estajiária: Zita Menezes