Hatutan.com, (12 Fevereiru 2024), Díli- Ministru Transporte no Komunikasaun (MTK), Miguel Marques Gonçalves Manetelu hateten, inísiu fulan-Maiu 2024 hahú instalasaun a kabu fibra ótika hosi tasi okos Díli bá Austrália.

Lee Mós: Governu Rekoñese Investimentu Privadu ba Instalasaun Kabu Fibra Ótika

Ministru Transporte no Komunikasaun (MKTK), Miguel Manetelu. Foto/ Elio dos Santos da Costa.

Ministru Transporte Komunikasaun (MTK) Miguel Marques Gonçalves Manetelu hateten bá jornalista sira hafoin hasoru-malu ho Prezidente Repúblika José Ramos-Horta  iha Palásiu prezidensiál, Díli, Segunda (12/02/2024).

Ministru Miguel Manetelu hateten iha enkontru ho Xefe Estadu ne’e atualiza kona-bá memorandu ne’ebé foin asina iha Indonézia, altura bainhira akompaña Primeiru-Ministru nia vizita ofisiál ba Jakarta.

MTK asina mós memorandu ida ho Ministériu Komunikasaun no Informasaun Indonézia. Memorandu ne’e iha pontu importante haat; ida mak kona-bá servisu rádiu komunikasaun, ida mak servisu telekomunikasaun, ida kona-bá aplikasaun sira iha informátika nian, no ida seluk kona-ba servisu postais no koreus (kantor pos).

Atu implementa pontu haat iha memorandu ne’e presiza estabelese komité konjunta ida, tékniku entre Indonézia, Ministériu Komérsiu Informasaun ho MTK no MNEK bele apar kooperasaun bilateral sira ne’ebé  selebra atu implementa.

“Pontu haat ne’e ha’u ko’alia liu kona-ba servisu telekomunikasaun, ita hatene hela katak antes ne’e iha kompañia Timoroan ne’ebé iha hela koopera ho kompañia Indonézia nian atu lori kabu fiber óptika liu husi fronteira terrestre,” nia tenik.

Nia afirma katak atualiza ba Prezidente Repúblika kona-ba fibra ótika duni, maibé ida investimentu estadu nian, hanesan ema hotu hatene katak estadu halo investimentu mai husi parte kabu submarinu fibra ótika atu mai Timor.

“Ha’u informa ba Xefe Estadu katak iha loron 27 Fevereiru iha Fransa, kabu ne’e tula ona atu lori mai Timor, hanesan ha’u hatete bei-beik ró ne’e sei to’o iha Timor se natureza hotu, tasi sira ne’e mós kalma ró ne’e sei to’o mai iha Timor fulan-Maiu hahú instalasaun bá ita nia kabu fibra ótika tasi okos nian, bele hahú husi Dili mak bá Austrália ida ne’e mós ha’u informa,” Ministru  Miguel Manetelu hateten.

Governante ne’e hatutan hanesan hatete bei-beik katak públiku sempre kestióna kona-ba internet, ho nune’e ohin informa ba Xefe Estadu hanesan mós ko’alia bei-beik ba íédia sira katak labele promete buat ida, mas se buat hotu la’o di’ak 2025 Timor-Leste laiha problema ho internet ne’e prosesu ida, prosesu ne’e la’o ho tempu, ema hotu tenke hein realidade no situasaun ohin loron sasán sira ne’e ladún di’ak duni liu-liu internet.

Jornalista: Vito Salvadór