Hatutan.com, (01 Marsu 2024), Díli – Osan   moeda falsu sentavu 50,  daudaun  ne’e, sirkula ona iha merkadu Timor-Leste, tanba ne’e, Polísia Nasional Timor-Leste (PNTL), Departamentu Investigasaun Kriminál (DIK) bolu atensaun bá públiku atu bele haree modelu osan sentavu 50 ne’e ho kuidadu.

Osan moeda sentavu 50 orijinál ho falsu. Foto/Elio dos Santos da Costa

Xefe Departamentu Investigasaun Kriminál PNTL,   Superintendente João Belo dos Reis, husu atu komunidade sira atensaun atu haree no hatene karik ema ruma uza osan moeda falsu sentavu 50  bele kontaktu ka informa ba polísia ne’ebé besik no bele mós kontaktu diretamente bá DIK liu hosi númeru telefone 77230194.

“Movimentu osan moeda falsu ne’e iha indikasaun hanesan; sentavu 50 ida ne’ebé mak original ho nia kór di’ak, no ida ne’ebé mak falsu nia kór metan uitoan ho nia diferensa iha nia-liña sorin kasar liu kompara ho ida ne’ebé mak original no iha parte hakerek iha kotuk  Repúblika Demokratika Timor-Leste ne’e, bá ida ne’ebé mak falsu ne’e la uza asentu ezemplu iha letra “A” ho “U”,” Superintendente Polísia João Belo dos Reis hateten bá jornalista sira liuhosi konferénsia imprensa iha Komandu Jerál PNTL, Caicoli, Díli, Sesta (01/03/2024).

“Husu bá públiku tomak karik ema ruma lori osan ne’e bá kompras iha ita nia bairru ka kioske sira,  halo favor informa imediatamente hodi ita bele halo prosesu buka tuir autór sira ne’ebé mak lori osan ne’e halo sirkulasaun iha ita rai,” nia tenik.

Agora daudaun PNTL hetan ona keixa hosi parte maluk balun no banku balu mós fó ona informasaun bá PNTL tanba ne’e  alerta bá populasaun tomak atu deteta id- ne’e.

Polísia presiza tebes apoiu hosi komunidade hotu  iha territóriu Timor-Leste atu bele komunika bá polísia bainhira hetan osan falsu ne’e rasik.

PNTL nia komunikasaun ho Banku agora sira daudaun lao hela hodi deteta osan ne’e no hola parte mós iha sosializasaun hodi ko’alia ho autoridade sira hodi sira bele hatene hodi hafasil  hetan informasaun kona-bá osan falsu ne’e.

Sirkulár BNCTL

Hosi sorin seluk, Prezidente Komité Ezekutivu BNCTL, António   Vito mós hasai ona sirkulár bá manager no diretór hotu iha front office  BNCTL nian atu kuidadu no tau-matan bá osan moeda falsu ho valor sentavu 50 ne’ebé tama ona iha sistema bankária nian.

“Ha’u hetan komunikasaun via telefone hosi Diretora Jerál Sara Lobo Brites hodi informa no halo konfirmasaun katak osan moeda falsu sentavu 50 komesa sirkula ona no osan falsu ner’e deteta ona iha Banku ida, nune’e espera la akontese iha BNCTL,” sita karta sirkulár BNCTL nian ne’ebé Hatutan.com asesu.

Jornalista Estajiáriu : Lazaro Pereira Quefi