Hatutan.com, (05 Marsu 2024), Díli—Diretór Ezekutivu Servisu Rejistu no Verifikasaun Emprezariál (SERVE) Institutu Públiku (IP), Florêncio Sanches lakohi fó komentáriu kona-bá problema funsionáriu na’in-166 iha instituisaun ne’e ne’ebé mak hapara ona sira nia kontratu no husu atu bele lori bá Ministériu Públiku (MP).

Diretór Ezekutivu SERVE,I.P, Florençio Sanches. Foto/Leopoldina de Carvalho.

Florêncio Sanches dehan, nia lakohi fó komentáriu tanba antes ne’e funsionáriu hirak ne’e halo ona konferénsia imprensa hodi hasai deklarasaun hasoru instituisaun ne’e.

Lee Mós: Kalbuadi Sei Hapara Duni Funsionáriu Kazuál IP-EP Tuteladu Iha MKAE-MTA

“Ha’u lakohi fó komentáriu tanba sira halo ona konferénsia públiku hasoru instituisaun. Ne’ebé sira hakarak bá Ministériu Públiku mós bele. Sira lori na’in-166 no ha’u ba ho na’in 64,” Florêncio Sanches hateten bá Jornalista Hatutan.com iha knaar-fatin, Caicoli, Tersa (05/03/2024).

Diretór ne’e deklara katak, antes ne’e nia parte ko’alia ona ho Ministru Koordenadór Assuntu Ekonómiku (MKAE), Francisco Kalbuadi Lay kona-bá problema ne’e hodi buka solusaun.

“Ha’u mós hato’o ona asuntu ne’e bá Ministru no ami koko buka ona solusaun, maibé sira halo uluk ona konferénsia imprensa entaun husik ona bá,” nia hateten.

Iha loron 22 fulan Fevereiru tinan 2024, funsionáriu SERVE,I.P na’in-166 halibru malu iha Jardin 12 de Novembru Motael Díli no hala’o konferénsia imprensa perante média nasionál sira hodi hato’o sira nia lamentasaun bá ditetór ezekutivu SERVE,I.P Florêncio Sanches ne’ebé hapara funsionáriu kontratadu hamutuk 166 iha instituisaun ne’e maski kontratu seidauk termina no tuir loloos sei termina iha loron 31 dezembru tinan 2027.

Portavós Benjamin Pinto hateten, funsionáriu SERVE,I.P hakarak hato’o bá públiku liu hosi média sira hotu bazeia bá desizaun diretór Ezekutivu SERVE,I.P Florêncio Sanches nian hodi sakrifika ka hapara funsionáriu sira nia direitu kontratuál bazeia bá termu kontratu ne’ebé institusionalmente selebra ho funsionáriu sira ho durasaun kontratu ne’ebé ho tinan lima (5) data termina ka remata kontratu iha loron 31 dezembru 2027.

Funsionáriu hirak ne’e konkorre no sai funsionáriu iha SERVE,IP liu hosi prossesu rekrutamentu ka konkursu públiku ne’ebé involve mós Komisaun Funsaun Públiku (KFP), funsionáriu balun servisu tinan ida ho balun, balun tinan ha’at (4), balun tinan hitu (7), balun tinan tinan ualu (8), balun tinan sanulu (10) hanesan funsionáriu SERVE,I.P, balun tuir formasaun iha rai laran no rai liur ne’ebé komprende di’ak ona  sistema servisu, maibé sira hasoru situasaun atuál:

1. Iha loron 17 fulan dezembru 2023 SERVE,I.P simu notifikasaun hosi Ministru Koordenadár Assuntu Ekonómiku (MKAE) hod husu ba dirijentes másimu Instituisaun Publiku no Empreza Publiku, inklui SERVE,I.P atu notifika funsionáriu sira ne’ebé kontratu termu sertu sei termina iha loron 31 fulan dezembru 2023 no sei labele halo renovasaun.
2. Iha loron 29 fulan dezembru 2023 diretór SERVE,I.P realiza kedan enkontru ofisiál ida ho funsionáriu hotu inklui munispiu ho RAEOA hodi halo avizu jerál no la halo notifikasaun ba funsionáriu por pessoa, alende ne’e diretór mós halo tan interpretasaun pareser juridiku ida ne’ebé hatun despaixu rasik iha Alinea C, hodi hateten katak juridikamente funsionáriu Ia iha relasaun ona ho SERVE,I.P maski kontratu sei moris signifika dirijente dezobediénsia saida mak hakerek iha notifikasaun maibé konsidera liu pareser juridiku ikus mai husu ba funsionáriu sira mantein kontaktu bainhira iha desizaun ruma hosi Ministru maibé ate a data Iaiha informasaun hosi dirijente másimu.
3. Iha loron 22 fulan Janeiru 2024 diretór SERVE,I.P fó sai estetmentu ba média nasionál sira, signifika dezobediénsia tebes desizaun hosi Ministru Koordenadór Assuntu Ekonómiku (MKAE) nian ne’ebé hato’o liu hosi notifikasaun, hosi estetmentu refere diretór Ezekutivu SERVE,I.P husu fila-fali bá Ministru liu hosi media katak funsionáriu SERVE,I.P hamutuk 166 pessoas ne’ebé agora daudaun sira nia pozisaun mamuk hela, karik desizaun Ministru nian atu halo fali rekrutamentu foun ka oinsa. Signifika diretór SERVE,I.P iha intensaun ne’ebé Ia di’ak ba nia funsionáriu rasik ho total 166 pessoas ne’ebé ho durasaun kontratu to’o 31 dezembru 2027.
4. Iha loron 26 Janeiru 2024 diretór SERVE,I.P Florêncio Sanches realiza enkontru mensal ida no liu hosi nia intervensaun katak problema hirak ne’ebé akontese iha Instituisaun laran labele lori ba Ministériu, aleinde ida-ne’e nia salienta katak sei la sai hosi SERVE,I.P, bainhira nia la komete krime no la iha ema ida mak bele hasai nia hosi SERVE,I.P. Diretur mós hateten tan katak nia la nomeia funsionáriu 64 pessoas atu hala’o knaar maibé xefi departamentu sira mak nomeia funsionáriu sira. Lia-fuan hirak ne’ebé diretór Ezekutivu ko’alia iha leten ne’e bazeia ba perguntas hosi funsionáriu SERVE, I.P nian.
5. Iha loron 29 fulan janeiru 2024, liu hosi reuniaun ofisial diretór SERVE.IP foti ona desizaun hodi hapara tan funsionáriu sira 63 pessoas bazeia ba sirkular interna ne’ebé fó sai ona hodi husu ba funsionáriu na’in-63 atu halo termu entrega no entrega sasan ka patrimonia Estadu nian nune’e labele kontinua tan servisu iha loron 1 fulan marsu 2024 ko’alia mós iha média.
6. Iha loron, 19 fulan fevereiru 2024, Ministru MKAE halo reuniaun hamutuk ho dirijente Institusaun Publiku (IP) no empreza Publiku (EP) hosi reuniaun ne’e Ministru nia deklaraun ne’e klaru ona maibé diretór ezekutivu la ezekuta desizaun refere no Ia iha informasaun ba funsionáriu 166 pessoas ne’ebé hein desizaun Ministru nian.
7. Iha loron 21 fevereiru 2024, diretór SERVE, I.P entrevista tan iha média katak, iha fulan marsu SERVE,I.P sei halo avaliasaun ba funsionáriu 64 pessoas inklui diretór rasik hodi aprezenta ba Vise Primeiru Ministru no Ministru Koordenadór Assuntu Ekonómiku nian hodi foti desizaun, la inklui halo avaliasaun bá funsionáriu 166 pessoas ne’ebé durante ne’e kumpre notifikasaun hosi Ministru hodi hein desizaun.
8. Jeralmente funsionáriu SERVE,I.P hamutuk 230 pessoas mak daudaun ne’e kontratu moris hela até dia 31 de dezembru 2027 maibé iha situasaun ida ne’e hafahe tiha funsionáriu ba rua hosi 166 pessoas ho kontratu ne’ebé hanesan hodi hein desizaun hosi Ministru Koordenadór Assuntu Ekonomiku nian no hosi funsionáriu 64 inklui diretór ezekutivu SERVE,IP rasik no iha situasaun seluk diretór rasik hodi mantein hala’o knaar hanesan baibain maski notifikasaun iha tiha ona.
9. Diretór SERVE,I.P halo intervensaun iha Ministeriu Finansas liu hosi payroll hodi husu autorizasaun ba prossesu pagamentu bazeia bá kontratu funsionáriu hamutuk 230 pessoas ne’ebé termina iha dia 31 de Dezembru 2027, maibé halo pagamentu de’it ba funsionáriu 64 pessoas sem baze legal ka koñesimentu hosi Ministru MKAE.
10. Iha loron 25 janeiru 2024 sirkular ho Nu. 02/VPM/MCAE, MTA/2024 hodi hateten katak, informa ba dirijente masimu hosi institutu publiku (IP) no empreza publiku (EP) atu labele simu funsionáriu foun enkoantu la iha autorizasaun hosi Ministru MKAE. Maibé diretór SERVE,I.P la intrepreta ka la esplika sirkular ne’e ba nia funsionáriu sira 166 pessoas ne’ebé paradu hodi hein desizaun Minsitru MKAE nian.

Portavós ne’e mós aprezenta kona-bá observasaun espesifiku hosi situasaun atuál ne’ebé funsionáriu SERVE,I.P hamutuk 166 hasoru mak hanesan tuir mai ne’e:

* Diretór SERVE,I.P Ia halo ka seidauk halo notifikasaun ba funsionáriu sira durante simu notifikasaun hosi Ministru MKAE.

*Estruturalmente SERVE,I.P Ia halo avaliasaun ba funsionáriu hahú hosi tinan 2021 to’o 2023 inklui funsionáriu 166 pessoas.

* Diretór SERVE,I.P uza kompeténsia rasik hodi autoriza prosesu pagamentu ba funsionáriu hosi total funsionáriu 230 pessoas ba deit ba 64 pessoas maski iha planu orsamentu anuál 2024 sita mós númeru funsionáriu 166 pessoas sen koñesimentu hosi Ministru Koordenadór Assuntu Ekonomiku. Maski simu ona notifikasaun ka seidauk iha resposta hosi Ministru MKAE iha fulan janeiru 2024 nian.

* Diretór SERVE,I.P ezekuta pareser juridiku sen hetan despaixu ka koñesimentu hosi Ministru Koordenadór Assuntu Ekonomiku hodi hapara funsionáriu 166 ne’ebé nia kontratu hanesan ka to’o 31 dezembru 2027.

* Funsionáriu 166 pessoas hapara durante fulan rua ona maski durasaun kontratu hanesan mós ho funsionáriu 64 pessoas ne’ebé oras ne’e ativu hela.

“Ami funsionáriu hosi SERVE,I.P hamutuk 166 pessoas ne’ebé tuir rekrutamentu liu hosi prosesu naruk ida no teste iha sistema ne’ebé estabelese iha Komisaun Funsaun Publika nian mak liu iha prosesu. Tanba ne’e ami husu tulun ba Ministru MKAE atu fó solusaun di’ak ida ba ami hodi nune’e ami bele hala’o fali ami nia knaar hanesan baibain. Ami nia kontratu sei moris hela maibé desizaun diretór SERVE,I.P liu hosi pareser juridiku  ne’ebé hatun rasik despaixu hodi hamate ona ami nia ahi matan. Hakarak husu ba Ministru MKAE bele fó solusaun di’ak ida bá ami. Karik la iha solusaun ami sei hato’o keixa bá PDHJ no Ministeriu Publiku,” Portavós Benjamin Pinto hateten.

Jornalista: Leopoldina de Carvalho/Lazaro Pereira Quefi