Hatutan.com, (14 Marsu 2024), Díli—Primeiru-Ministru (PM), Kay Rala Xanana Gusmão sei hatán kona-bá plájiu ne’ebé Sekretáriu Estadu Komunikasaun Sosiál (SEKOMS) halo bá livru planu estratéjiku Konsellu Imprensa (KI) nian.

Primeiru-Ministru (PM), Kay Rala Xanana Gusmão.

Kay Rala Xanana Gusmão hato’o assuntu ne’e hodi responde pergunta jornalista Hatutan.com relasiona ho plájiu ne’ebé SEKOMS halo bá dokumentu planu estratéjiku Konsellu Imprensa nian, hafoin hasrou-malu ho Prezidente Repúblika (PR), José Ramos-Horta iha Palásiu Prezidensiál Bairru-Pité, Kinta (14/03/2024).

Lee Mós:  SEKOMS Halo Plájiu Bá Livru Planu Estratéjiku Konsellu Imprensa Nian

“Ami seidauk ko’alia kona-bá ida-ne’e, tanba ne’e tenke informa bá ida-ne’e no horiseik ami sai hosi Konsellu Ministru tuku 18:00 ona,” Xanana Gusmão hateten.

Xefe Governu hatutan, la’ós komunikasaun sosiál mak importante liu buat sira seluk ne’ebé povu presiza hela.

“Ne’ebé ida-ne’e loron seluk mak ha’u sei responde,” Xanana Gusmão subliña.

Antes ne’e, Sekretáriu Estadu Komunikasaun Sosiál (SEKOMS), Expedito “Loro” Dias Ximenes, klarifika katak Governu ka instituisaun Estadu ida iha nia planu atu bele orienta nia servisu durante mandatu hodi tau knaar no atividade saida mak atu halo tanba Valores no prinsípiu sira ne’e hakerek iha planu estratéjiku.

“Planu Estratéjiku ne’e bele la’o tuir loloos planu ne’e no bele mós tanba nesesidade balun bele mós la tuir, mas mínimu hanesan liña jerál bá programa instituisaun ida nian. Ha’u hanoin la’ós SEKOMS de’it mak halo planu estratéjiku, instituisaun sira barak mak halo planu estratéjiku hodi haree atinjimentu tinan ida, planu asaun, annual, oinsá depois haree programa tinan-lima ne’e oinsá, responde duni planu estratéjiku ka la’e. Se la’e, tinan ida ita bele halo avaliasaun hadi’a fali planu estratéjiku ne’e,” SEKOMS Expedito Loro Dias Ximenes hateten hodi responde pergunta jornalista Ajensia Notisioza TATOLI,I.P nian liuhosi entrevista eskluzivu ne’ebé transmite direita hosi live streaming TATOLI, Tersa (12/03/2024).

Kona-bá ne’e, eskritór Timoroan, Carlos da Silva Lopes Saky, konsidera Sekretáriu Estadu Komunikasaun Sosiál (SEKOMS), Expedito “Loro” Dias Ximenes laiha koñesimentu natoon kona-bá definisaun plájiu.

Eskritór Livru ho títulu “RENETIL Iha Luta Libertasaun Timor-Lorosa’e: Antes Sem Títulu, Do Que Sem Pátria!” ne’ebé lansa iha loron, 22 fulan-Maiu 2015  ne’e hateten, ema ruma nia obra  akadémiku ka obra intelektuál ne’ebé ema prodús bá livru bainhira ema seluk foti parágrafu ida de’it, mak la sita nia referénsia iha footnote ka roda-pé, maka atetude ne’e plájiu.

Ba assuntu nee, Konsellu Imprensa Timor-Leste (CI, sigla portugés) liuhosi plenáriu  extraordináriu, Sesta (08/03/2024), deside sei haruka karta ofisial bá Sekretáriu Estadu Komunikasaun Sosiál (SEKOMS), Expedito “Loro” Dias Ximenes hodi hatudu plenária CI nia lamentasaun bá atitude plájiu hosi SEKOMS bá planu Estratéjiku CI 2022-2026.

Karta ofisiál lamentasaun CI nian ne’ebé sei haruka mós koñesimentu bá Primeiru-Ministru (PM), Kay Rala Xanana Gusmão ho Ministru Prezidénsia Konsellu Ministru, Hermenegildo “Agio” Pereira ne’ebé tutela bá SEKOMS ne’e sei subliña mós pozisaun forte CI nian hodi husu SEKOMS tenke “nulu” ka anula nia planu Estratéjiku 2024-2028 tanba bele prezudika CI nia polítika  Orsamentu Jerál Estadu tinan 2025.

Konteúdu karta ofisial ne’e mak hanesan;

1. Husu SEKOMS konsidera Planu Estratéjiku SEKOMS nian ne’ebé plájiu CI nian ne’e nulu no labele tau iha asaun.
2. Tanba propriedade planu estratéjiku CI nian ne’e, propriedade intelektuál CI nian.
3. Obra Planu Estratéjiku CI nian ne’ebé plájiu hosi SEKOMS bá planu estratéjiku SEKOMS nian ne’e obra ema funsionáriu no ajente inklui konselleiru, ho totál 49 ninia obra, katak obra instituisaun CI nian.

Jornalista: Vito Salvadór