Hatutan.com, (19 Marsu 2024), Díli—Cruz Vermelha Timor Leste (CVTL) koopera ho Conselho Imprensa (CI) hodi fó formasaun durante loron tolu bá Jornalista sira hosi média estatál no m’edia privada sira kona bá primeiru sokoru.

Cruz Vermelha Timor Leste (CVTL) koopera ho Conselho Imprensa (CI) hodi fó formasaun durante loron tolu bá Jornalista sira hosi média estatál no média privada sira kona-bá primeiru sokoru iha edifísiu CVTL nasionál bairru-Formosa Díli, Tersa (19/03/2024).

Formasaun ne’e mós bele realiza tanba Cruz Vermelha Timor Leste servisu hamutuk ho Cruz Vermelha Internasionál ho objetivu atu eleva koñesimentu oinsa atu ajuda ema bainhira hetan susar ruma.

Lee Mós: Dezastre Naturál Estraga Uma 30 Iha Airaca-Lau

“Ida-ne’e importante bá jornalista sira iha Timor Leste hodi aumenta sira nia koñesimentu liuliu bá primeiru sokorus bainhira jornalista sira hala’o atividade kobertura iha konflitu nia laran,” Sekretáriu Jerál CVTL, Luis Pedro Pinto hateten iha edifísiu CVTL nasional bairru-Formosa Díli, Tersa (19/03/2024).

CVTL mós hetan rekoñesimentu legál hosi Estadu Timor Leste iha loron 17 fulan Agostu 2005 ho Dekretu Lei númeru 6/2005 nu’udár sosiedade nasionál, ho nia misaun atu salva vida ho hadi’a kualidade moris ema vulnerável sira sen fin lukrativas no rekompensa ruma.

“Bainhira iha situasaun konflitu, dezastre naturais ho situasaun normal média nia papél mós importante tebes, tanba jornalista sira tenki tun bá terrenu, iha fatin asidente, konflitu sira tanba ida-ne’e mak ita loke formasaun ida-ne’e ba sira atu sira loke sira nia koñesimentu atu oinsa bele ajuda ema sira iha situasaun difisil nia laran,” nia hateten.

Nia hatutan, média iha Timor-Leste mós iha parseiru di’ak ho Cruz Vermelha Timor-Leste tanba ne’e kooperasaun ida-ne’e tenki kontinua hala’o hodi fahe esperiénsia bá malu ho koñesimentu ne’ebé natón kona-bá primeiru sokorus atu ajuda ema seluk no mós ajuda sira nia an rasik.

Iha fatin hanesan Konselleira Conselho Imprensa, Isabel Maria de Jesus hateten, kapasitasaun bá rekursu umanus ne’e presiza tebes liuliu iha formasaun sira hanesan ne’e.

Tanba ne’e, CI agradese tebes bá CVTL ne’ebé iha ona kooperasaun di’ak atu kapasita jornalista hotu-hotu hosi média oioin iha Timor Leste.

Jornalista Estajiáriu:  Lázaro Pereira Quefi