Hatutan.com, (01 Abríl 2024), Díli— Deputadu sira iha Parlamentu Nasionál (PN) konsidera Igreja Katoliká iha obrigasaun hodi alerta kona-bá problema morál no edukasaun iha sosiedade nian leet.

Konsiderasaun ne’e liga ho karta pastorál bá Paskua tinan 2024 nian, hosi Amu Bispu sira iha Timor-Leste (TL) ne’ebé fó-sai bá sosiedade katak, Igreja mós preokupa ho problema sosiál no morál ne’ebé ohin loron sai problema iha sosiedade nia leet.

Lee Mós: Karta Pastorál Hosi Bispu Sira iha Timor bá Páskua 2024

Deputadu bankada CNRT, Patrocinio dos Reis Fernandes hateten, Igreja Katólika iha obrigasaun duni hodi alerta kona-bá problema morál no edukasaun iha sosiedade nian leet.

“Ida-ne’e obrigasaun Igreja Katólika nian atu alerta bá sosiedade tomak. Ida-ne’e la’ós responsabilidade ema ida nian inklui ita boot sira jornalista, deputadu no sosiedade tomak. Ne’e Igreja alerta parte moral bá ema hotu-hotu atu haree iha aspetu ida-ne’e nune’e ita nia país ida-ne’e bele harii sosiedade ida ho moral, moris iha valór kulturál no sosiedade ida nakonu ho ema edukadu no sivilizadu,” Patrocinio Fernandes hateten iha PN, Segunda (01/04/2024).

Nia dehan, presiza muda maka paradigma kona-bá edukasaun tanba dalaruma ema hanoin katak edukasaun ne’e sentraliza iha eskola. Maibé eskola ne’e fatin atu bá simu siénsia no morál ne’e iha sosiedade iha inan-aman no familia ida-ne’e mak huun no abut.

Iha fatina hanesan deputadu bankada FRETILIN, David Dias Mandati hateten, karta pastorál ne’ebé fó-sai pertinente, tanba uluk iha funu laran promete buat barak bá malu, solidariedade, irmandade, fraternidade, sosiedade justa no sira seluk, maibé ohin loron ida-ne’e la iha. 

Nune’e, Igreja Katólika hamosu morál ho nia definisaun badak katak, espiritu dedikasaun ne’e la’ós bá sasan de’it, maibé oinsá atu respeita malu, ajuda malu no halo solidariedade bá malu maka morál ninia definisaun loloos espiritu dedikasaun nian.

“Haree bá realidade agora ne’e, ita nia sosiedade sai kalkulista buat hotu-hotu sura ezemplu sé ha’u liga ho maluk ida mais la’ós arbiru de’it maibé ho interese ida katak saida mak ha’u bele hetan hosi nia. Kuandu ha’u manan tiha saida mak ha’u buka, depois husik tiha nia, bá fali ema seluk, tanba hakarak buka menan ka buka lukru ho ema seluk,” nia hateten.

Tanba ne’e, nia dehan, hahalok ida-ne’e la’ós sidadaun di’ak ka kriatura Maromak Nian, tanba liga malu ho interese atu buka manan buat ruma hosi ema seluk, nune’e Igreja Katólika preokupadu ho ida-ne’e.

Jornalista Estajiária: Zita Menezes