Hatutan.com, (19 Novembru 2021), Dili—Prezidente Autoridade Rejiaun Administrativa Espesiál Oecuse Ambeno (RAEOA), promete dala ida tan, sei utiliza orsamentu adisionál ne’ebé VIII Governu Konstitusionál fó iha Orsamentu Jerál Estadu (OJE) 2021, ho montante millaun $14, hodi konklui konstrusaun Ró Haksolok, iha meiu 2022.

Prezidente Autoridade RAEOA Mari Alkatiri akompaña hosi Bispu Eméritu Dom Carlos Filipe Ximenes Belo, SDB ho Madre Guilhermina Marçal FdCC, hala’o lansamentu ba ró Haksolok iha Portugál, Sesta (26/05/2017). Foto/ISQ.

Promesa ne’e tanba prosesu negosiasaun faze dahuluk atu lori ró Haksolok mai Timor-Leste (TL), remata ona no Oras-ne’e daudaun situasaun estaleiro mondelo ho Atlanticeagle Portugál iha ona TL ninia kontrolu ho pursentu 95%.

Estaleiro no ró ne’e rasik sei rejista uza RAEOA nia naran liu hosi empreza ne’ebé autoridade rasik mak estabelese ho naran Sosiedade Komérsiu Dezenvolvimentu.

Liu hosi empreza ne’e, fó mós biban atu iha tinan oin (2022), bainhira prosesu rehabilitasaun ba ró Haksolok la’o fila-fali, TL rasik mak sei kontrola tomak.

Hosi prosesu ne’e, TL sei manan esperiénsia no aban  bainrua bele iha investimentu ba estaleiro, hodi harii dokas ba manutensaun ró iha TL.

“2022 ró Haksolok sei to’o iha TL no oras-ne’e hahú ona rehabilitasaun. Laiha ona aumentu orsamentu ba prosesu rehabilitasaun ba ró Haksolok, tanba sei mantein ho orsamentu adisionál millaun $14 ne’ebé Governu integra ba RAEOA iha orsamentu 2021,” Arsénio Bano hateten iha Palásiu Governu, Sesta (19/11/21).

Primeiru Ministru (PM) mós husu atu aban bairua RAEOA harii dokas iha TL hodi bele iha fatin própriu ba manutensaun ró no la presiza lori ba tán rai-liur.

Ho pedidu ne’e, Prezidente Autoridade RAEOA prontu atu explora hanoin sira hosi Xefe Governu nian, hodi serbí públiku ho di’ak liu tán.

Autoridade RAEOA mós halo hela esforsu hodi halo rekrutamentu ba jerente ida ne’ebé sei halo jestaun ba estaleiro no prosesu tomak ligadu ho rehabilitasaun ró Haksolok.

“Tuir ha’u-nia predisaun ró Haksolok bele to’o iha TL iha tinan oin, tanba hahú Janeiru tinan oin ita hahú ona prosesu hotu kona-bá ro ne’e no iha tinan klaran ita bele hatene ona ró Haksolok to’o iha TL,” Arsénio promete tan.

Eis Prezidente Autoridade RAEOA Marí Bim Amude Alkatiri hamutuk ho Bispu Eméritu Dom Carlos Filipe Ximenes Belo, SDB akompaña hosi Madre Guilhermina Marçal FdCC, hala’o ona lansamentu  ba ró Haksolok iha tasi Figueira da Foz-Portugál, iha Sesta 26 Maiu 2017.

Ró ne’e rasik Governu TL mak hola no halo konstrusaun hosi empreza Portugueza Atlanticeagle Shipbuilding, Konsultór mai hosi ISQ-Portugál.

Ró Haksolok ninia medida, naruk metru 72 iha kapasidade atu bele tula passajeiru hamutuk na’in 377, bele mós tula ho karreta hamutuk 23 no sasan seluk tan.

Osan ba konstrusaun ró Haksolok, eis Prezidente Autoridade Mari Bim Amude Alkatiri selu ona Euro milliaun 13-resin ba kompañia Portugueza Atlanticeagle Shipbuilding.

Jornalista: Vito Salvadór