Hatutan.com, (28 Fevereiru 2023), Díli-Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio da Paixão Bano, konfirma katak konstrusaun ró Haksolok sei finaliza iha loron 28 fulan-Novembru 2023.

Lee Mós : CAC Bolu Antigu Ministru Ináçio Moreira Nu’udár Sasin bá Konstrusaun Ró Haksolok

Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio da Paixão Bano. Foto/Elio dos Santos da Costa

“Konstrusaun maka, ha’u dehan, iha tinan kotuk, 65%, agora, ita bele dehan 75% iha faze finalizasaun. Ne’e mak ami dehan, loron 28 fulan-Novembru  2023, Ró Haksolok tenke hotu, tuir kontratu ne’ebé mak ami asina,” Arsénio Bano hateten, hafoin atualiza servisu  RAEOA nian bá Primeiru-Ministru (PM), Taur Matan Ruak iha Palásiu Governu, Díli, Tersa (28/2/2023).

Arsénio Bano hateten, dadaun ne’e, Autoridade RAEOA halo hela preparasaun liuhosi halo rekrutamentu bá Timoroan sira, atu bele haruka bá tuir formasaun kona-bá tripulante, oinsá halo operasaun no kontrola ró Haksolok. Nune’e, uainhira Ró Haksolok mai Timor-Leste, Timoroan hirak-ne’e iha ona koñesimentu.

“Tripulante sira timoroan, ami halo selesaun, fulan ida-ne’e, atu bá halo formasaun iha Portugál iha estaleiru,” Arsenio hateten.

Prezidente autoridade RAEOA ne’e dehan, molok ne’e, sira haruka uluk ona timoroan sira balu bá Jakarta kuaje dala-rua ka dala-tolu ona, kona-bá eletrisista, serbisu sira iha aeroportu nian.

“Tuir ami nia planu sei haruka timoroan na’in-20 bá uluk tuir formasaun nune’e  prepara tripultante timoroan servisu iha estaleiru,” Arsénio Bano hateten tán.

Autoridade RAEOA Sei Rekupera Kondisaun Otél 5 Estrela iha Loe-Upu

Autoridade Rejiaun Administrativa Espesial Oecusse Ambeno (RAEOA), dadaun ne’e, halo ona koordenasaun ho kompañia ida, atu oinsá bele hadi’a no rekupera fila-fali kondisaun Otél 5 Estrela iha área Loe-Upu, Ambeno.  

Arsénio Bano informa, iha kompañia ida mak intereseadu tebes, atu hahú investimentu iha área ne’ebá no ne’e iha turizmu ninian. Kompañia ne’e halo ona diskusaun ho RAEOA, atu halo rekuperasaun bá Otél 5 Estrela ne’e iha Loe-Upu, Ambeno.

“Ita-boot sira hatene dehan, Otel ne’e tempu hirak liubá, prezidente ida uluk, deside tiha bá halo karantina. La’ós nia sala, tanba fatin laiha duni, no agora, RAEOA prepara atu rekupera ho servisu hamutuk ho kompañia ne’e para otel ne’e bele fila-fali bá kondisaun,” Arsénio Bano hateten.

Prezidente autoridade RAOEA ne’e rejeita mós informasaun katak, durante ne’e, Otél 5 Estrela abandona de’it. Maibé, loloos ne’e, sira utiliza hela iha kada semana, bá realiza eventu ruma.

“Otél ne’e  la abandona, ami uza hela. Semana-semana sai hela, ami uza hela fatin ne’e. Só ke, ha’u ohin, informa bá señor Primeiru Ministru, iha kompañia ida ke interesadu atu serbisu ho RAEOA, para rekupera tomak fatin, Otél ne’e, para depois ita bele uza hanesan Otél Loe-Upu,” hateten Arsénio Bano.

Jornalista: Rogério Pereira Cárceres