Hatutan.com, (11 Abríl 2024), Díli- Reprezentante Santa Sé mai Timor-Leste, Mgr. Marco Sprizzi hateten, sarani fiar na’in sira tenke prepara an ho ksolok no iha esperansa hodi simu vizita Santu Padre Papa Francisco mai Timor-Leste.

Lee Mós: Governu Aloka Millaun $12 bá Komisaun Altu Nivel Institusionál bá Vizita Papa Francisco

Reprezentante Santa Sé mai Timor-Leste, Mgr. Marco Sprizzi. Foto/Elio dos Santos da Costa

“Ha’u enkoraja mós sarani fiar na’in sira atu prepara an ho ksolok, gratidaun, esperansa no ho ksolok hanesan Timoroan atu bele simu Papa nia vizita ho orgullu no bele sai hanesan forsa ida ne’ebé dudu ema hosi fuan laran hodi kontribui bá pás. Hanesan sarani di’ak, sidadaun di’ak, preparasaun sira tenke integradu hodi simu Santo Padre ho pás, rekonsiliasaun, atu nune’e, bensaun sira bele sulin bá família no ema seluk liu hosi ita-nia moris loroloron,” Mgr. Marco Sprizzi  hateten bá jornalista sira hafoin enkontru ho Xefe Estadu iha Palásiu Prezidensiál, Kinta (11/04/2024).

Tuir reprezentante Santa Sé iha Timor-Leste nia observasaun kona-bá preparasaun ne’ebé Governu no Estadu Timor-Leste halo hodi hein vizita Papa Francisco nian ne’e exelente tebes.

Antes ne’e, hasoru malu ho Primeiru-Ministru Kay Rala Xanana Gusmão, ohin, ho Prezidente Repúblika José Ramos-Horta no kuaze loroloron kontaktu ho Ministru Administrasaun Estatál (MAE) Tomas do Rosário Cabral no Ministru Prezidénsia Konsellu Ministru (PCM) Hermenegildo “Agio” Pereira no ho Ministériu relevante sira seluk hanesan Ministériu Obras Públikas (MOP), Ministériu Interiór (MI) no ministériu sira seluk.

“Ha’u hare katak Estadu no Governu Timor-Leste halo hela preparasaun ida estraordináriu no exelente atu povu Timor-Leste bele realiza sira nia mehi hodi hasoru Papa Francisco ho matan rasik no besik liután iha Papa Francisco nia sorin ho orgullu,” Nia  hateten.

Haree bá preparasaun ne’ebé iha sei sai orgullu ida tanba Papa Francisco mai bá povu, tan ne’e gastu sira bá preparasaun ne’e atu povu Timor ne’ebé mai husi foho, aldeia no knua sira bele iha kondisaun atu besik ho Papa Francisco ho maneira saudavel, seguru no lojistikamente adekuadu.

Aban, Igreja Anúnsiu Loron Vizita Papa Francisco Mai Timor

Reprezentante Santa Sé mai Timor-Leste Mgr. Marco Sprizzi hatete sorumutuk ho Prezidente Repúblika, José Ramos-Horta ko’alia kona-bá preparasaun bá vizita Papa Francisco nian mai Timor-Leste  tamba ne’e sei la ko’alia klaramente iha ne’e tanba, Sesta  aban (12/04/2024), iha kámara ekleziástika Díli sei iha anunsia ofisiál bá vizita Santu Padre Papa Francisco nian mai Timor-Leste.

“Aban, sei iha anúnsiu ofisial bá loron vizita Papa Francisco nian no sei ko’alia asuntu hotu liu-liu liga ho vizita Papa Francisco nian. Tamba ne’e ,konvida ho ksolok ita-boot jornalista sira atu hola parte,” Mgr. Marco Sprizzi informa.

Jornalista: Vito Salvadór