Hatutan.com, (12 Abríl 2024), Díli—Autoridade Munisípiu Díli liuhosi Diresaun Servisu Obras Públiku, fulan-rua (2) ona, la rekolla reseita hosi pagamentu estasionamentu nian iha Dili laran tanba la iha resibu ka billete.

Lee Mós: Governu Sei Transforma Sidade iha Territóriu Nasionál Sai Moos, Organizadu, Saudavel no Seguru

Atividade Estasionamentu iha área Banco Nacionál Ultramarinho (BNU) nian iha tempu resibu ka billete iha. Foto/Tome da Silva

Diretór Diresaun Servisu Obras Públiku  Munisípiu Díli, Aleixo H.G.L da Cruz, hateten durante fulan-rua (2) billete ka resibu bá pagamentu iha estasionamentu laiha tanba laiha orsamentu atu prodús. Tanba ne’e, reseita ikus hosi tinan kotuk (2023) to’o Janeiru 2024 hamutuk $2000.

“Parte  fulan-Fevereiru to’o fulan-Marsu ne’e laiha buat ida tanba orsamentu ne’ebé aloka bá prodús resibu ne’e natoon de’it, foin daudauk ne’e, foin loke fali konkursu hodi buka kompañia atu bele manan projetu bá prodús resibu ne’e,”   Aleixo H.G.L da Cruz informa bá Hatutan.com iha knar fatin,  Díli, Sesta (12/04/2004).

Nia hatutan, planu kria resibu bá iha estasionamentu ne’e hahú hosi Ministériu Finansas, maibé iha tinan 2023 entrega fali mai fali iha Munisípiu Dili mak prepara resibu ne’e. Signifika, fulan-rua (2) mak billete ne’e laiha dezde loron 19 fulan-Fevereiru to’o agora. Nune’e, iha duni kompañia tolu (3) mak konkorre ba projetu ne’e, maibé kompañia ida mak manan ne’e mak Silvia.

Daudaun ne’e billete ne’e iha faze  produzsaun tanba foin asina kontratu iha loron 4 fulan-Abríl, tinan ne’e.

Estasionamentu iha Díli laran ne’e hamutuk neen (6) mak hanesan;  

1. Husi rotunda prezidente Francisco Xavier do Amaral to’o iha área Kuluhun.
2. Husi kruzamentu Bidau, diresaun bá Ospitál Nasionál Guido Valadares ( HNGV) mai to’o Audian
3. Husi Toko Lay, Palacio do Governo nia sorin mai to’o iha Colmera.
4. Parte Hotel Timor ho Jardim 5 de Maio
5. Bemori Loja Bukit Bintang
6. Merkadu Taibesi

Pesoál ne’ebé destaka iha estasionamentu hala’o nia servisu hodi tau-matan bá motór ho karreta sira ne’ebé para iha estasionamentu. Foto/Tome da Silva

Diretór Servisu Obras Públika Munisipiu Díli ne’e relata tan katak problema  ne’ebé dau-daun sira-nia parte enfrenta mak menus rekursu umanus.  Tanba, oras ne’e,  pesoál ne’ebé servisu kobra estasionamentu ne’e  na’in-43. Maibé numera ne’e labele kobre distánsia ne’ebé dook, tanba kada estasionamentu ema na’in-ida (1) kobre distánsia kilómetru lima (5).

Ho menus pesoál iha kada estasionamentu,  parte Munisípiu Díli jere atu ema ida  bele kobre to’o distánsia metru  100, maibé se  metru 100 mak ema ida ne’e, nia volta bá mai de’it labele kobre hotu.

Ho problema billete ka resibu pagamentu kada estasionamentu ne’ebé laiha, maibé servisu estasionamentu sei funsiona nafatin mezmu  gratuitu, signifika ba ema ne’ebé para motór ho karreta la selu.

Diretór Diresaun Servisu Obras Públiku Munisípiu Díli nia parte la autoriza nia membru sira atu rekolla taxa hosi motorizada ka karreta sira ne’ebé para iha estasionamentu tanba billete ka resibu sidauk iha.

Nia parte nafatin husu ba seguransa estasionamentu sira atu kontinua servisu ho di’ak hodi kontrola karreta no motór sira ne’e atu para tuir liña  ne’ebé prepara ona.

Jornalista: Leopoldina de Carvalho